Toshkentda erkak kishi diniy nikohda birga yashagan voyaga yetmagan qizga nisbatan zoʻravonlik qilishda gumonlanmoqda

Toshkentda erkak kishi diniy nikohda birga yashagan voyaga yetmagan qizga nisbatan zoʻravonlik qilganlikda gumonlanmoqda

Toshkentning Olmazor tumanida huquq-tartibot idoralari erkak kishi bilan diniy nikohda yashab kelgan oʻsmir qizga nisbatan zoʻravonlik qilingani haqidagi xabarni tekshirmoqda. Dastlabki maʼlumotlarga koʻra, u qizga nisbatan jismoniy kuch ishlatgan va jinsiy xususiyatga ega harakatlarni sodir etib, unga jarohat yetkazgan.

Milliy ijtimoiy himoya agentligi xabariga koʻra, 2025 yil 28 avgust kuni erkak qiz bilan diniy nikoh qurgan. Shundan soʻng ular birga yashay boshlagan.

Hozirda Olmazor tumani IIB xodimlari tergovga qadar tekshiruv oʻtkazmoqda. Yuz bergan holatga barcha holatlar aniqlangandan keyin huquqiy baho beriladi.

Kuni kecha qiz va uning xolasi bilan «Inson» ijtimoiy xizmatlar markazi mutaxassislari hamda IIB xodimlari uchrashdi. Hozirda asosiy vazifa — voyaga yetmagan qizning xavfsizligini taʼminlash, uning huquqlarini himoya qilish va ruhiy holatini barqarorlashtirishga yordam berishdan iborat.

Bundan tashqari, qizga taʼqib va takroriy zoʻravonlikdan himoya qilishi kerak boʻlgan himoya orderi rasmiylashtirildi.

Milliy ijtimoiy himoya agentligi vaziyat nazoratda ekanini, voyaga yetmagan qizga nisbatan zarur qoʻllab-quvvatlash choralari koʻrilayotganini maʼlum qildi.

Bundan avval Andijon viloyatida yana bir shov-shuvli voqea yuz bergan edi: diniy nikohda boʻlgan erkak oʻzining nogironligi boʻlgan turmush oʻrtogʻini vahshiylarcha oʻldirgan edi.