Toshkentda biznes-kayfiyat II chorakda koʻtarildi
Markaziy bank soʻrovi shuni koʻrsatdiki, Toshkent shahri va viloyati tadbirkorlarining 53 foizi 2026 yilning II choragida ishbilarmonlik muhiti yaxshilanganini qayd etgan.
Toshkentda biznes-kayfiyat II chorakda koʻtarildi
Toshkent shahri va Toshkent viloyatida biznes yuritish uchun sharoitlar yaxshilanganini qayd etgan tadbirkorlar ulushi 2026 yilning ikkinchi choragida 53% ga yetdi — bu oʻtgan yilning shu davridagi koʻrsatkichdan (50%) 3 foiz punktga koʻpdir. Bu haqda ishbilarmonlik faolligi soʻrovnomasi yakunlariga tayanib Oʻzbekiston Respublikasi Markaziy banki xabar bermoqda.
Soʻrovnoma maʼlumotlariga koʻra, buyurtmalar hajmi oshganini qayd etgan respondentlar ulushi 2025 yilning ikkinchi choragidagi 47% ga nisbatan 51% ni tashkil etdi. Soʻrovnoma ishtirokchilarining 50% i ishlab chiqarish hajmi oshganini maʼlum qildi — bir yil avval ushbu koʻrsatkich 43% darajasida edi.
Qoʻshimcha ishchi kuchiga boʻlgan talabni tadbirkorlarning 43% i (bir yil avval 41%), yuk tashish hajmi oshganini esa xuddi shunday 43% i (2025 yilda 42%) qayd etdi. Kredit va qarzlar boʻyicha toʻlovlar koʻpayganini respondentlarning 37% i maʼlum qildi, oʻtgan yilning mos davrida bu koʻrsatkich 36% boʻlgan.
Korxonalarda ishlab chiqarish quvvatlaridan foydalanish darajasi oʻtgan yilning shu davriga nisbatan 18 foiz punktga oshdi.
Keyingi chorak uchun baholashlar ham yaxshilandi. Tadbirkorlarning 51% i buyurtmalar hajmi oshishini kutmoqda (2025 yilda 50%), ishlab chiqarish hajmi oshishini — 46% (45% ga nisbatan), ishchi kuchiga boʻlgan talabning oʻsishini esa — 45% (bir yil avval 44%) kutmoqda.
Soʻrovnomaga koʻra, buyurtmalar hajmining oʻsishi asosan qayta ishlash sanoati, qishloq xoʻjaligi va qurilish sohalarida kutilmoqda.
Yaqin uch yil ichida iqtisodiyot va ishbilarmonlik muhiti yaxshilanishiga ishonch bildirgan tadbirkorlar ulushi 82% ni tashkil etdi — bu 2025 yilning ikkinchi choragidagi koʻrsatkichdan (57%) 25 foiz punktga yuqoridir.