Toshkentda 6 sentyabr kuni mashinalar soni 1,35 milliongacha kamaydi
Yakshanba kuni Toshkent yoʻllarida 1,35 mln. transport vositasi harakatlandi, yoʻllardagi tirbandlik esa besh balldan oshmadi.
Toshkentda 6 sentyabr kuni avtomobillar soni 1,35 milliongacha kamaydi
6 sentyabr kuni poytaxt yoʻllarida bir sutkada 1 348 994 ta transport vositasi harakatlandi. Bu bir kun oldingiga nisbatan 120 954 ta mashinaga kamdir. Bu haqda Toshkent shahar Yoʻl harakatini tashkil etish markazi xabar bermoqda.
YHTEM maʼlumotlariga koʻra, 5 sentyabr kuni transport oqimi 1 469 948 ta transport vositasini tashkil etgan edi. Shu tariqa, yakshanba kuni yoʻllardagi mashinalar soni taxminan 8,2 foizga kamaygan.
Jamoat transporti 6 sentyabr kuni 170 ta yoʻnalishda xizmat koʻrsatdi. 1 363 ta avtobus 19 778 ta qatnovni amalga oshirib, 783 090 nafar yoʻlovchini tashidi.
Toshkent metropoliteni bir sutka davomida 640 834 nafar yoʻlovchiga xizmat koʻrsatdi.
Shu bilan birga, kun davomida poytaxt yoʻllaridagi tirbandlik darajasi besh balldan yuqori boʻlgani qayd etilmadi.
Transport vaziyatiga sakkizta hududda olib borilgan kommunal ishlar qisman taʼsir koʻrsatdi. Ishlar Bogʻishamol, Al-Xorazmiy, Shokirariq, P. Mahmud, Samarqand Darvoza, Dilsaroy koʻchalarida, Vestminster hududidagi tor koʻchalarda, shuningdek, Farhod va Lutfiy koʻchalari chorrahasida olib borildi.
YHTEM haydovchilarga safarlarni rejalashtirishda yoʻllardagi vaziyatni oldindan hisobga olishni va zarurat boʻlganda muqobil yoʻnalishlarni tanlashni tavsiya qildi.
Yoʻl harakati qoidalariga rioya etilishini nazorat qilish doirasida YHXB xodimlari tomonidan 6 sentyabr kuni transport vositalarining piyodalar yoʻlaklari boʻylab harakatlanishi bilan bogʻliq 12 ta, toʻxtab turish qoidalarini buzish boʻyicha 27 ta va toʻxtash qoidalarini buzish boʻyicha 22 ta holat aniqlandi.
Yana uchta qoidabuzarlik jamoat transporti harakati uchun moʻljallangan «A» yoʻlagidan foydalanish bilan bogʻliq boʻldi.
Haydovchilarga piyodalar yoʻlaklarida va ularning oldida toʻxtamaslik, belgilangan oʻtish joylarida piyodalarga yoʻl berish, avtobus bekatlari hududlarini egallab olmaslik va ajratilgan «A» yoʻlagidan foydalanmaslik zarurligi eslatib oʻtildi.
Shuningdek, avtotransport vositalari haydovchilari avtobuslarning bekatlarga kirishi va ulardan chiqishida toʻsqinlik qilmaslikka chaqirildi.
Poytaxtdagi transport oqimi va yoʻllarning tirbandligi Vaziyatlarni boshqarish markazida real vaqt rejimida kuzatib borilmoqda.
Olinayotgan maʼlumotlardan transport yuklamasi va yoʻllardagi vaziyat oʻzgarishini tezkor nazorat qilish uchun foydalanilmoqda.