Toshkent zoohimoyachilari bolani mushukka shafqatsiz munosabatda boʻlishga jalb qilgan kattalarni javobgarlikka tortishni talab qilmoqda. Video

1 soat oldin

Ijtimoiy tarmoqlarda kattalar mushukning boʻyniga arqon bogʻlab, uni bolaga berayotgani aks etgan video tarqaldi. Tasvirda jonzot qarshilik koʻrsatib, qutulishga harakat qilayotgani, bola esa bu vaqtda arqonni tortayotganini koʻrish mumkin. Ushbu rolik Toshkent zoohimoyachilarining eʼtirozlariga sabab boʻldi, ular huquqni muhofaza qiluvchi organlarni sodir boʻlgan voqeani tekshirishga va kattalarning xatti-harakatlariga huquqiy baho berishga chaqirishdi.

Bu haqda Animal Life in Uzbekistan hamjamiyati vakillari maʼlum qilib, kattalar sodir boʻlayotgan voqeani toʻxtatmagani, aksincha, unga bolani jalb qilganiga eʼtibor qaratishdi.

Zoohimoyachilarning fikricha, bu kabi holatlar bolalarda hayvonlarga boʻlgan munosabat haqida buzilgan tasavvurni shakllantirishi mumkin. Ular aynan kattalar bolalarda hayvonlarga nisbatan insonparvarlik munosabatini shakllantirishi va shafqatsizlikka yoʻl qoʻymasligi kerakligini taʼkidladilar.

Hamjamiyat vakillari sodir boʻlgan voqea holatlarini aniqlashga va agar qonuniy asoslar mavjud boʻlsa, aybdorlarni Huquqbuzarliklar toʻgʻrisidagi kodeksning hayvonlarga nisbatan shafqatsiz munosabatda boʻlganlik uchun jazoni nazarda tutuvchi 111-moddasi boʻyicha javobgarlikka tortish masalasini koʻrib chiqishga chaqirdilar.

Maqola chop etilgan vaqtda huquqni muhofaza qiluvchi organlardan rasmiy munosabat bildirilmagan edi.

Avvalroq Toshkent metropolitenining "Kosmonavtlar" bekatida izlarga tushib qolgan mushuk qutqarilgan edi. Metropoliten xodimlari vaziyatni darhol nazoratga olishgan, shundan soʻng tonnel inshootlari xizmatining texnik yordam ustasi mushukni izlardan xavfsiz olib chiqqan.