Toshkent YHXB yangi vaqtinchalik rahbarga ega boʻldi
Toshkent YHXBga yangi vaqtinchalik rahbar tayinlandi
Podpolkovnik Ilhom Idirov Toshkent shahar IIBB Yoʻl harakati xavfsizligi boshqarmasi boshligʻi vazifasini yangi bajaruvchi etib tayinlandi. Tayinlov haqida rasmiy xabar berilmagan, biroq uning ismi poytaxt Xalq deputatlari Kengashining 25 sentyabrdagi qarorida — idora zimmasiga muayyan topshiriqlar ijrosi yuklatilgan bandlarda qayd etilgan.
Bundan avval Idirov Qashqadaryo viloyati YHXBga rahbarlik qilgan, 2025 yilning iyul oyida esa Sirdaryo viloyati IIB YHXB boshligʻi etib tayinlangan edi.
Kengashning ushbu qarori 2026 yilning birinchi yarmida "Xavfsiz va ravon yoʻl" umumilliy dasturini amalga oshirish boʻyicha ishlar yakunlari va yoʻllarda xavfsizlikni taʼminlash chora-tadbirlariga bagʻishlangan.
Hujjatda, shuningdek, poytaxt YHXBning asosiy vazifalari belgilab berilgan. Idoraga yoʻl belgilarini oʻrnatish va almashtirishni, chiziqlar chizishni, svetofor obʼyektlarini qurish va rekonstruktsiya qilishni jadallashtirish topshirilgan. Bundan tashqari, yoʻl harakatini boshqarishni raqamlashtirishni davom ettirish, jumladan, shaharga kirish joylari va chorrahalarda videokuzatuv kameralarini oʻrnatish rejalashtirilgan.
Yana bir yoʻnalish — YTHlarning oldini olish. YHXB Maktabgacha va maktab taʼlimi boshqarmasi bilan birgalikda maktab va bogʻchalarda yoʻl harakati qoidalarini oʻrgatuvchi sinflarni tashkil etishi lozim. Bundan tashqari, idoraga profilaktika ishlarini kuchaytirish va bir hafta muddatda poytaxt tumanlarida oʻlim holatlarini kamaytirish boʻyicha manzilli chora-tadbirlar rejasini ishlab chiqish topshirilgan.
Qarorda Mirzo Ulugʻbek tumanidagi yoʻl holati alohida tilga olingan. YHXB hokimliklar bilan birgalikda Xirmontepa, Mirzo Ulugʻbek va Sayram koʻchalarida harakatni tashkil etish boʻyicha takliflarni koʻrib chiqishi kerak.
Bundan avvalroq, byudjet mablagʻlarini talon-toroj qilish boʻyicha jinoyat ishi figuranti boʻlgan ichki ishlar vazirining sobiq oʻrinbosari Bekmurod Abdullayev Toshkent shahri Chilonzor tumani Ichki ishlar organlari faoliyatini muvofiqlashtirish boshqarmasi boshligʻi etib tayinlangani maʼlum boʻlgan edi.