Toshkent xalqaro moliya markazi WAIFC ning toʻlaqonli aʼzosiga aylandi

**Toshkent xalqaro moliya markazi WAIFC’ning toʻlaqonli aʼzosiga aylandi**

Toshkent xalqaro moliya markazi (TXMM) Xalqaro moliya markazlari jahon alyansiga (WAIFC) toʻlaqonli aʼzo sifatida qabul qilindi va oʻzining rasmiy faoliyati boshlanishidan oldin ilk xalqaro eʼtirofga sazovor boʻldi. WAIFC Kengashi ushbu qarorni 15 sentyabr kuni Pusan shahrida boʻlib oʻtgan yigʻilishda qabul qildi.

WAIFC butun dunyo boʻylab moliya markazlarini, jumladan, London, Frankfurt, Lyuksemburg, Dubay, Gonkong, Pusan va Astanani birlashtiradi. Guruh xalqaro moliya markazlari oʻrtasidagi hamkorlik platformasi boʻlib xizmat qiladi hamda moliya sohasida tajriba va ilgʻor amaliyotlar bilan almashishni ragʻbatlantiradi.

Toshkent 2022 yildan buyon WAIFC faoliyatida ishtirok etib keladi va bungacha kuzatuvchi maqomiga ega edi. Toʻlaqonli aʼzo boʻlish uning Alyansdagi rolini kengaytiradi va tadqiqotlar, ekspertlik dasturlari hamda hamkorlik tashabbuslaridan foydalanish imkoniyatini beradi.

Taqdim etilgan maʼlumotlarga koʻra, toʻlaqonli aʼzolik Toshkent xalqaro moliya markaziga moliyaviy tartibga solish, investorlarni himoya qilish va zamonaviy moliyaviy vositalarni yaratish kabi sohalarda xalqaro tajribadan foydalanish imkonini beradi.

TXMM, shuningdek, Alyans doirasida amalga oshiriladigan qoʻshma tadqiqot va ekspertlik dasturlariga qoʻshilishi mumkin boʻladi, bu esa boshqa aʼzo moliya markazlari bilan tajriba almashish imkoniyatlarini yaratadi.

Ushbu aʼzolik Toshkent xalqaro moliya markazining rasmiy ish boshlashi arafasidagi ilk xalqaro eʼtirofidir. Bu, shuningdek, markazning xalqaro moliyaviy hamjamiyatga integratsiyalashuviga va nufuzli moliyaviy markazlar bilan hamkorlikni mustahkamlashga yordam berishi kutilmoqda.

TXMMni rivojlantirish Oʻzbekistonning yangi moliyaviy platforma yaratish hamda xalqaro moliya institutlari va bozorlari bilan aloqalarni chuqurlashtirish borasidagi saʼy-harakatlarining bir qismidir.

WAIFC’ning toʻlaqonli aʼzosi sifatida Toshkent xalqaro moliya markazi boshqa aʼzo moliya markazlari bilan birgalikda Alyans faoliyatida ishtirok etadi va uning moliya sektorini rivojlantirish, tadqiqotlar va tajriba almashish borasidagi qoʻshma ishlariga hissa qoʻshadi.