Toshkent viloyatida kreditini to‘lamagan fuqaroning uyi auksionga qo‘yib yuborildi
Uyning boshlang‘ich bahosi 1 mlrd 447 mln 500 ming so‘m etib belgilangan
Toshkent viloyatida kredit qarzini uzmagan fuqaroning uyi auksionga chiqarildi
Toshkent viloyatining Nurafshon shahrida kredit qarzdorligini to‘lamagan fuqaroga tegishli turar joy elektron onlayn-auksion orqali savdoga qo‘yildi.
Ma’lum qilinishicha, Fuqarolik ishlari bo‘yicha Uchtepa tumanlararo sudining ijro varaqasiga ko‘ra, qarzdor Z.Sh. va boshqalardan «Sanoatqurilishbank» ATB foydasiga 1 mlrd 329 mln 340 ming so‘m kredit qarzdorligini undirish belgilangan.
Qarzdorlikni qoplash maqsadida Nurafshon shahri, «Bobur» mahallasi, Olmazor ko‘chasida joylashgan garovdagi turar joyga undiruv qaratilgan. Uyning boshlang‘ich narxi 1 mlrd 447 mln 500 ming so‘m etib belgilangan.
Majburiy ijro byurosi xodimlari qarzdorga qarzni to‘lamagan taqdirda garovdagi mulk sotilishi haqida ogohlantirish bergan.
Shunga qaramay, qarzdorlik qoplanmagani sababli turar joy xatlanib, elektron onlayn-auksion orqali sotuvga chiqarilgan.