Toshkent shahri markazidagi stadion buzib tashlanyapti
Toshkent shahri Yakkasaroy tumanidagi sobiq «Toʻqimachi» stadioni buzilib, uning oʻrni boshqa turdagi qurilish boshlash uchun boʻshatilyapti. Bir yil oldin kuchga kirgan prezident qarorida davlatga tegishli boʻlgan futbol stadionlari va maydonlarining foydalanish maqsadlarini oʻzgartirish va sotuvga chiqarish taqiqlangandi.
Toshkent markazidagi stadion buzilmoqda. Yakkasaroy tumanining Shota Rustaveli koʻchasida joylashgan sobiq «Toʻqimachi» stadioni hozirda demontaj qilinmoqda. Sport inshootlari va unga tegishli obyektlar olib tashlanayotgan boʻlsa-da, ushbu buzilishning sabablari, yer maydonining yangi egasi va stadion oʻrnida nima qurilishi haqida hozircha aniq maʼlumotlar mavjud emas.
Eslatib oʻtamiz, 2025-yil 21-avgustda «Oʻzbekistonda futbol sohasini raqamlashtirish va ommaviyligini yanada oshirish chora-tadbirlari toʻgʻrisida»gi prezident qarori imzolangan edi. Ushbu qarorga koʻra, davlat mulki boʻlgan futbol stadionlari va maydonlarining foydalanish maqsadlarini oʻzgartirish hamda ularni sotuvga chiqarish taqiqlangan. Shuningdek, Kadastr agentligi axborot tizimlariga davlat mulkidagi futbol stadionlari va maydonlarining foydalanish maqsadlari oʻzgartirilishi hamda sotuvga chiqarilishi taqiqlanishi haqida tegishli oʻzgarishlar kiritilishi lozim edi.