Toshkent osmonidan yorqin obyekt uchib o‘tdi. Fanlar akademiyasi holatga munosabat bildirdi
Toshkent osmonida yorqin obyekt uchib o‘tdi. Fanlar akademiyasi bu holatga izoh berdi
19-sentyabr kuni kechqurun Toshkent osmonida yorqin bo‘lib, ortidan uzun iz qoldirgan obyekt kuzatildi. Fanlar akademiyasi Astronomiya instituti mutaxassislarining dastlabki tahliliga ko‘ra, bu hodisada meteor yoki bolidga xos belgilar aniqlanmadi.
Institutning katta ilmiy xodimi Kamoliddin Ergashevning aytishicha, tarqalgan foto va videolarda obyektning tashqi ko‘rinishi, harakatlanish xususiyati hamda qoldirgan izi ko‘proq raketa yoki uning yuqori bosqichi bilan bog‘liq hodisani eslatadi.
Dastlabki orbital hisob-kitoblarga ko‘ra, 19-sentyabr kuni Xitoyning Taiyuan kosmodromidan Long March-2D tashuvchi raketasi yordamida PIESAT-2 turkumidagi to‘rtta sun’iy yo‘ldosh uchirilgan. Raketaning uchirish vaqti, orbitasi hamda Toshkent osmonida hodisa kuzatilgan vaqt va yo‘nalish o‘rtasida moslik borligi qayd etilgan.
Shu bois, hozirgi bosqichda Toshkentda kuzatilgan hodisa ushbu kosmik uchirishning raketa bosqichi yoki undan keyingi orbital jarayonlardan biri bilan bog‘liq bo‘lishi mumkinligi taxmin qilinmoqda. Biroq mutaxassislar obyektni aynan Long March-2D raketasining muayyan qismi deb qat’iy aniqlashga hali erta ekanini ta’kidlagan.
Astronomiya instituti xulosasiga ko‘ra, hozircha Toshkent osmonida kuzatilgan yorqin hodisa meteor yoki bolidga xos emas.
Videoda qayd etilgan hodisaning meteorit tushishi yoki boshqa tabiiy yoxud texnogen manba bilan bog‘liqligi rasman tasdiqlanmagan.