Toshkent metrosi uchun 70 ta yangi vagon xarid qilinadi
Ushbu loyiha qiymati yetkazib beruvchi va kredit shartlariga qarab 168,6 mln dollardan 356,2 mln dollargacha
**Toshkent metrosi uchun 70 ta yangi vagon xarid qilinadi**
Xalq deputatlari Toshkent shahar Kengashi metropoliten uchun yangi poyezdlar xarid qilish loyihasi konsepsiyasini tasdiqladi.
Loyihani Toshkent metropoliteni ishlab chiqqan. Hozircha yetkazib beruvchi ham, xarid narxi ham aniqlanmagan.
Yangi vagonlar eskirgan tarkiblarni almashtirish va metro harakat tarkibini to‘ldirish uchun zarur. Amaldagi vagonlarning bir qismi bir necha o‘n yildan beri foydalanib kelinmoqda. Agar ular yangilanmasa, poyezdlar soni kamayishi, harakat oralig‘i uzayishi va yo‘lovchilarga xizmat ko‘rsatish sifati pasayishi mumkin.
Har bir poyezd beshta vagondan iborat bo‘lishi belgilangan. Amaldagi bekat platformalari taxminan 100 metr bo‘lgani sababli olti vagonli tarkiblar sig‘maydi. Bekatlarni qayta qurish esa katta xarajat talab qiladi.
Yangi poyezdlar mavjud infratuzilmaga mos bo‘lishi, rels oralig‘i 1520 mm, kontakt relsidan quvvatlanishi 825 volt, maksimal tezligi esa soatiga 90 kilometr bo‘lishi kerak.
Amaldagi 81−717/714 seriyali vagonlardan farqli ravishda, yangi poyezdlarda kuchliroq asinxron dvigatellar, rekuperativ tormozlash tizimi, tezlanish va tormozlanish ko‘rsatkichlarining yaxshilanishi, past pol, konditsionerlar, zamonaviy axborot va yoritish tizimlari hamda kengroq salon bo‘lishi talab etilgan.
Germaniyaning «Siemens» kompaniyasi o‘z yechimlari texnik talablarga mos emasligini bildirgan va tijorat taklifini bermagan.
Rasmiy tijorat takliflarini Xitoyning «CRRC» va Rossiyaning «GTR» kompaniyalari taqdim etgan. Qolgan beshta kompaniya bo‘yicha hisob-kitoblar o‘xshash bitimlar haqidagi ochiq ma’lumotlar asosida amalga oshirilgan.
Konsepsiyada Xitoyning «CRRC», Rossiyaning «Global transport yechimlari» va Janubiy Koreyaning «Hyundai Rotem» kompaniyalari takliflari eng maqbul deb ko‘rsatilgan.
Rossiyadan boshqa yetkazib beruvchi tanlansa, yangi vagonlar uchun depo va texnik xizmat ko‘rsatish punktlarini qurish talab etilishi mumkin. Bu xarajat 10,1 mln dollarga baholangan va loyiha hisob-kitoblariga kiritilgan.
2026-yilda yetkazib beruvchini tanlash, moliyalashtirish manbasini belgilash va kredit shartnomasini imzolash rejalashtirilgan. Poyezdlar 2027-yilda uchta partiyada, taxminan 10 oy davomida yetkazib berilishi kerak. Ularni qabul qilish va foydalanishga topshirishni 2027-yil noyabrigacha yakunlash belgilangan.
Toshkent metropoliteni davlat subsidiyalari hisobiga faoliyat yurituvchi notijorat tashkilot hisoblanadi. Konsepsiyaga ko‘ra, variantlarning hech biri moliyaviy jihatdan o‘zini qoplamaydi. Kreditlarni davlat budjeti hisobidan qaytarish rejalashtirilgan.
Hisob-kitoblarga ko‘ra, yangi poyezdlar 2028-yilda 18,7 mln, 2030-yilda 22,6 mln va 2035-yilda 27,4 mln yo‘lovchini tashishi kutilmoqda. Loyiha doirasida 61 ta ish o‘rni yaratilishi rejalashtirilgan.
Shuningdek, ayrim yo‘lovchilarning shaxsiy va boshqa transport vositalaridan metroga o‘tishi natijasida yo‘llardagi tirbandlik kamayishi mumkin. Hisob-kitoblarda zararli moddalar chiqindilarini yiliga o‘rtacha 4 ming tonnaga qisqartirish imkoniyati ham ko‘rsatilgan.