Toshkent metrosi uchun 14 ta besh vagonli poyezd sotib olish rejalashtirilmoqda, yettita kompaniya koʻrib chiqilmoqda
Toshkent metrosi uchun 14 ta besh vagonli poyezd (jami 70 ta vagon) sotib olish rejalashtirilmoqda. Hozirda faqat toʻrt vagonli tarkiblardan foydalanilmoqda. Olti vagonli poyezdlar varianti ham koʻrib chiqildi, biroq platformalar uzunligi bunga imkon bermaydi. Yettita xalqaro ishlab chiqaruvchi oʻrganilmoqda.
Toshkent metropoliteni uchun 14 ta besh vagonli poyezd, yaʼni 70 ta vagon xarid qilish rejalashtirilmoqda. Xorijiy hukumatlar va moliya institutlari mablagʻlarini jalb etishni nazarda tutuvchi loyiha kontseptsiyasi 8 oktyabr kuni xalq deputatlari shahar kengashi tomonidan maʼqullandi. Loyihani amalga oshirishni 2027 yil yakuniga qadar yakunlash koʻzda tutilgan.
Hujjatda metropolitenni shaxsiy transportga munosib muqobil sifatida rivojlantirish, yoʻnalishlarning oʻtkazuvchanlik qobiliyatini oshirish, texnik va funktsional jihatdan eskirgan harakatlanuvchi tarkibni bosqichma-bosqich yangilash, foydalanish xavfsizligi va ishonchliligini oshirish, yoʻlovchilarga xizmat koʻrsatish sifatini yaxshilash hamda ekspluatatsiya xarajatlarini, shu jumladan taʼmirlash va elektr energiyasi xarajatlarini qisqartirish muhimligi taʼkidlangan.
Kontseptsiyani tayyorlash jarayonida olti vagonli tarkiblarni sotib olish varianti ham koʻrib chiqildi. Biroq metro stantsiyalarining uzunligi faqat besh vagonli poyezdlardan foydalanish imkonini beradi. Ularni qayta qurish juda katta moliyaviy xarajatlarni talab qilgan boʻlardi, deyiladi hujjatda.
Hozirda poytaxt metrosida faqat toʻrt vagonli tarkiblardan foydalanilmoqda. 2023 yil boshida tajriba tariqasida Oʻzbekiston yoʻnalishidagi toʻrtta poyezdga bittadan vagon qoʻshildi, bu esa sigʻimni 1000 nafardan 1300 nafar yoʻlovchigacha oshirdi. Biroq poyezdlarni yanada uzaytirish rejalari davom ettirilmadi.
Kontseptsiyada metro poyezdlari ishlab chiqaruvchi yettita xorijiy kompaniya oʻrganilgan. Mualliflar, shuningdek, yetkazib berish xarajatlari, kreditlash shartlari, poyezdlarni saqlash va ularga texnik xizmat koʻrsatish joylarini yaratishni oʻzaro solishtirishgan.
Gap CRRC (Xitoy), Kawasaki Rail Car (Yaponiya), CAF (Ispaniya), Alstom (Frantsiya), «Globalniye Transportniye Resheniya» (Rossiya), Škoda Transportation (Chexiya) va Hyundai Rotem (Janubiy Koreya) kompaniyalari haqida bormoqda. Tijorat takliflarini faqat Xitoy va Rossiya kompaniyalari taqdim etgan. Germaniyaning Siemens kompaniyasi oʻz yechimlari Toshkent metropoliteni talablariga javob bermasligini maʼlum qilib, oʻz xizmatlarini taklif qilmagan.
Shu bilan birga, Rossiya ishlab chiqaruvchisi tanlangan taqdirda, amaldagi depo va infratuzilmani qayta qurish talab etilmasligi qayd etilgan. Biroq, kredit foizlari tufayli loyihaning yakuniy qiymati yuqoriroq boʻlib chiqmoqda.
Kontseptsiyada yangi vagonlar eski 81−717/714 («Nomernoy») vagonlari bilan ham solishtirilgan. 110 kVt quvvatga ega oʻzgaruvchan tok dvigatellari oʻrniga 170 kVt quvvatga ega asinxron tortuvchi dvigatellar koʻzda tutilgan.
Bosh vagonlarda 40 tadan, oraliq vagonlarda esa 44 tadan oʻrindiq boʻlishi, tik turib ketadigan yoʻlovchilar joyi esa 176 tadan 330 tagacha boʻlishi kerak.
Bugungi kunda Toshkent metropolitenining toʻrtta yoʻnalishi umumiy uzunligi 70 km boʻlib, 50 ta stantsiyaga ega. Kuniga oʻrtacha 800 mingdan ortiq yoʻlovchi tashiladi. Sentyabr oyi oxirida rekord koʻrsatkich — 1,2 milliondan ortiq yoʻlovchi qayd etildi.