Toshkent metrosi 7 sentyabr kuni ertalab uzilishlarsiz ishladi
7 sentyabr kuni ertalab Toshkent metropolitenining toʻrtta yoʻnalishida 64 ta harakat tarkibi 243 821 yoʻlovchini tashidi, metro faoliyati barqaror ravishda amalga oshirildi.
7 sentyabr kuni ertalab Toshkent metropoliteni uzilishlarsiz ishladi
7 sentyabr kuni ertalab, tigʻiz vaqtda Toshkent metropoliteni odatiy tartibda faoliyat koʻrsatdi: soat 07:00 dan 10:00 gacha toʻrtta yoʻnalishda 64 ta poyezd yoʻlovchilarga xizmat koʻrsatdi va ular 243 821 ta yoʻlovchi tashish safarini amalga oshirdi. Bu haqda Toshkent shahar THBM (Transport tizimini kompleks rivojlantirish loyiha ofisi) xabar bermoqda.
Ushbu davrda oliy taʼlim muassasalarida yangi oʻquv yili boshlangani munosabati bilan shahar transporti faoliyati doimiy nazoratda boʻldi. Monitoring hamkor tashkilotlar bilan birgalikda olib borildi.
Yoʻlovchi oqimi eng yuqori boʻlgan «Chilonzor» va «Oʻzbekiston» yoʻnalishlarida barqaror harakatni taʼminlash maqsadida poyezdlar oraligʻidagi intervallar qisqartirildi. THBM maʼlumotlariga koʻra, koʻrilgan chora-tadbirlar ertalabki tigʻiz vaqtda metropolitenning barqaror ishlashini taʼminlash imkonini berdi.
Vaziyatlarni boshqarish markazi real vaqt rejimida stantsiyalar va yoʻnalishlardagi vaziyatni kuzatib bordi. Monitoring davomida poyezdlar harakatida uzilishlar va noqulayliklar qayd etilmadi. Stantsiyalarda yoʻlovchilar tirbandligi ham kuzatilmadi.
Bundan tashqari, ertalabki tigʻiz vaqtda yoʻlovchilarga xizmat koʻrsatish bilan bogʻliq favqulodda vaziyatlar yuz bermadi.
THBM metropoliten va jamoat transportining boshqa turlari faoliyati hamon doimiy nazoratda ekanini taʼkidladi.
Asosiy eʼtibor yoʻlovchilar uchun qulay va xavfsiz sharoitlar yaratishga qaratilgan.