Toshkent – Mavrikiy: toʻgʻridan-toʻgʻri aviareyslar dekabrdan boshlab yoʻlga qoʻyiladi
Toshkent – Mavrikiy: toʻgʻridan-toʻgʻri aviareyslar dekabrdan boshlab yoʻlga qoʻyiladi
2026 yil 26 dekabrdan boshlab Toshkent va Mavrikiy (Sharqiy Afrika) oʻrtasida toʻgʻridan-toʻgʻri aviareyslar boshlanadi. Birinchi bosqichda 26 dekabrda bitta reys va 2027 yil yanvarda yana toʻrtta reys nazarda tutilgan. Kelasi yilning iyun oyidan boshlab yoʻnalishni muntazam rejimga oʻtkazish — haftasiga bir martadan reys amalga oshirish rejalashtirilmoqda.
Yangi yoʻnalish ishga tushirilishi haqida bugun Toshkentda Turizm qoʻmitasi ishtirokida boʻlib oʻtgan Oʻzbekiston va Mavrikiy turizm biznesi vakillarining uchrashuvida maʼlum qilindi.
Mavrikiy — Afrikaning sharqiy qirgʻoqlari yaqinida, Hind okeanida joylashgan orol-davlat. Yangi toʻgʻridan-toʻgʻri yoʻnalish ikki mamlakat oʻrtasidagi sayohatlarni osonlashtirishi va sayyohlar almashinuvini oshirishi kerak.
Oʻzbekiston uchun Mavrikiy kirish turizmining yangi bozori sifatida ham koʻrilmoqda. Shu bilan birga, Mavrikiy fuqarolari uchun Toshkent, Samarqand, Buxoro va Xivaga tashrif buyurish maqsadida Oʻzbekistonga kelish osonlashadi.
Yangi yoʻnalishning yana bir maqsadi — tranzit yoʻlovchilarni jalb qilishdir. Istiqbolda Qozogʻiston, Rossiya hamda Markaziy Osiyo va MDHning boshqa mamlakatlaridan kelgan sayyohlar Toshkent orqali Mavrikiyga uchishlari mumkin boʻladi.
Shu tariqa, Toshkent tranzit yoʻlovchilar sonining oʻsishiga va mintaqaviy aviatsiya xabi sifatida oʻz mavqeini mustahkamlashga umid qilmoqda.