Toshkent Kengashi hokimiyat tomonidan manfaatlar toʻqnashuvi toʻgʻrisidagi qonunning ijro etilishini qoniqarli deb topdi

Toshkent Kengashi hokimiyat tomonidan manfaatlar toʻqnashuvi toʻgʻrisidagi qonunning ijro etilishini qoniqarli deb baholadi

Tekshiruvlar yakunlariga koʻra, 24 nafar xodim bilan mehnat shartnomalari bekor qilindi, yana 7 nafari 21 ta tijorat tashkilotida taʼsischi sifatida ishtirok etishni tugatdi. Bu haqda Kengashning 2026 yil 23 oktyabrdagi qarorida aytiladi.

Toshkent shahar hokimining komplayens va ichki korruptsiyaga qarshi nazorat boʻyicha oʻrinbosari Mirmuhammad Mirhamidovning hisobotiga koʻra, 9 nafar xodim ishtirokidagi 10 ta tijorat tashkiloti tugatish jarayoniga oʻtkazildi. Yana 6 nafar xodim ishtirokidagi 5 ta tijorat va notijorat tashkilotlari tugatildi hamda davlat reyestridan chiqarildi. Bundan tashqari, 6 nafar xodim tijorat tashkilotidagi rahbarlik faoliyatini tugatdi.

Qonunchilik talablari buzilishiga yoʻl qoʻygan hokimliklarning 49 nafar xodimi bilan yakka tartibda profilaktik suhbatlar oʻtkazildi. 55 nafar xodimning masalalari odob-axloq komissiyalari tomonidan koʻrib chiqilib, ularga nisbatan ogohlantirish koʻrinishidagi maʼnaviy taʼsir chorasi qoʻllanildi.

Hisobotda Chilonzor va Shayxontohur tumanlari hokimliklarining ikki nafar xodimida oʻrindoshlik asosida ishlash talablari buzilgani alohida koʻrsatib oʻtilgan. Ulardan birining Toshkent shahar Turizm boshqarmasidagi oʻrindoshlik faoliyati bekor qilindi. Ushbu holat boʻyicha materiallar shahar prokuraturasiga yuborildi.

Profilaktika ishlari doirasida Bektemir, Mirzo Ulugʻbek, Chilonzor, Uchtepa va Yangihayot tumanlari hokimliklarida manfaatlar toʻqnashuvining oldini olish, korruptsiyaga qarshi kurashish va odob-axloq qoidalariga rioya qilishga bagʻishlangan seminarlar oʻtkazildi. Bundan tashqari, hokimlik tizimi xodimlari uchun odob-axloq qoidalari aks etgan broshyura nashr etildi.

Shuningdek, korruptsiya va manfaatlar toʻqnashuvi haqidagi xabarlarni qabul qilish uchun ishonch telefoni (55-507-01-10) va TShH antikorrupsiya Telegram-boti yangilandi va qayta ishga tushirildi.

Kengash manfaatlar toʻqnashuvini aniqlash, oldini olish va bartaraf etish boʻyicha tizimli tekshiruvlarni davom ettirish, aniqlangan har bir holat boʻyicha qonunchilikka muvofiq choralar koʻrish, shuningdek, xodimlar oʻrtasida tushuntirish va profilaktika ishlarini kuchaytirishni topshirdi.