Toshkent futbol boʻyicha ayollar oʻrtasidagi U-17 Markaziy Osiyo chempionatiga mezbonlik qiladi

Toshkent futbol boʻyicha U-17 qizlar oʻrtasidagi Markaziy Osiyo chempionatiga mezbonlik qiladi

Oʻzbekiston qizlar oʻsmirlar terma jamoasi 15 sentyabrdan Markaziy Osiyo chempionligi unvonini himoya qilishni boshlaydi. CAFA U-17 Women’s Championship turniri Toshkentda boʻlib oʻtadi va 19 sentyabrda yakuniga yetadi.

Kubok uchun oʻzbekistonlik qizlar bilan birga Eron, Qirgʻiziston va Tojikiston terma jamoalari kurash olib boradi. Uy uchrashuvlari oʻtadigan turnirda U-17 milliy terma jamoasiga Mahliyo Sarikova boshchilik qiladi.

Oʻzbekiston terma jamoasi uchun ushbu turnir chempionlik unvonini saqlab qolish imkoniyati boʻladi. Oʻtgan yili jamoa CAFA U-17 Women’s Championship musobaqasida biror marta magʻlubiyatga uchramay gʻolib chiqqan edi: futbolchi qizlar Eron va Tojikistonni 1:0 hisobida magʻlub etishgan, Qirgʻiziston bilan oʻyinni esa golsiz durang bilan yakunlashgandi. Uchta uchrashuv yakunlariga koʻra, oʻzbekistonlik qizlar birinchi oʻrinni egallashgan.

Bundan avval Oʻzbekiston U-20 ayollar terma jamoasi ham CAFA turniri gʻolibiga aylangan edi. Hal qiluvchi oʻyinda jamoa Tojikistonni 7:0 hisobida tor-mor keltirib, musobaqani magʻlubiyatsiz yakunlagandi.