Tojikistonda turizm solig‘i joriy etiladi
Tojikistonda turizm sohasini rivojlantirish maqsadida yangi soliq joriy etilmoqda. Bu haqda “AsiaPlus” xabariga tayanib, mamlakatda Turizmni rivojlantirish fondi tashkil etilgani ma’lum qilindi. Fondning moliyaviy manbalaridan biri fuqarolardan undiriladigan turizm solig‘i bo‘ladi.
Fondning asosiy vazifasi turizm sohasida faoliyat yurituvchi kompaniyalarni qo‘llab-quvvatlash va ushbu sohani rivojlantirishdan iborat. Hukumat 1-iyul kuni fondni tashkil etish va uning faoliyatini tartibga soluvchi qarorni imzolagan.
Hujjatga ko‘ra, fond mablag‘lari uchun Moliya vazirligi Markaziy g‘aznachilik bosh boshqarmasida maxsus hisob raqami ochiladi. Mablag‘lar fond kengashi qarorlari asosida sarflanadi.
**Mablag‘ mahalliy va xorijiy sayyohlardan yig‘iladi**
Fond bir nechta manbalar hisobidan moliyalashtiriladi. Ulardan biri Tojikiston fuqarolarining chet elga sayohat qilish uchun sotib olgan turistik paketlari qiymatining 5 foizini tashkil etadi. Ya’ni, tojikistonliklar xarid qilgan turpaketlar qiymatining 5 foizi fondga o‘tkaziladi.
Bundan tashqari, fondga xorijiy turistlarning mamlakatdagi har bir sutkalik sayohati uchun turistik paketlaridan olinadigan yig‘im, turistik xizmatlar ko‘rsatishga ruxsat beruvchi hujjat uchun yig‘im, ushbu yig‘imlarni to‘lashdan bo‘yin tovlaganlik uchun jarimalar, depozitlardan daromadlar, shuningdek, xalqaro moliya tashkilotlarining grantlari va maqsadli mablag‘lari kelib tushadi.
Fondga tushgan mablag‘lar faqat belgilangan maqsadlar uchun sarflanadi. Ular turizm infratuzilmasini yaratish va rivojlantirish, kadrlar tayyorlash, soha xodimlarini ijtimoiy qo‘llab-quvvatlash, xizmatlar sifatini oshirish, mamlakatning turizm imkoniyatlarini targ‘ib qilish, innovatsiyalarni joriy etish va tadqiqotlar o‘tkazishga yo‘naltiriladi.
Yil davomida sarflanmagan mablag‘lar keyingi yilga o‘tkaziladi. Shuningdek, har oy fondga tushgan mablag‘ning 30 foizi “Turizm xizmatlari axborot markazi” hisob raqamiga o‘tkaziladi. Bu mablag‘ tezkor tadbirlarni o‘tkazish va soha xodimlarini rag‘batlantirishga sarflanadi.