Toʻrt kunda yana oltita oltin. Oʻzbekiston Osiyo oʻyinlarida toʻrtinchi oʻringa koʻtarildi
25-28 sentyabr kunlari Oʻzbekiston terma jamoasi Osiyo oʻyinlarida yana 16 ta — 6 ta oltin, 5 ta kumush va 5 ta bronza medalini qoʻlga kiritdi. Jamoa umumiy natijani 42 ta medalga yetkazdi va turnir jadvalida toʻrtinchi oʻringa koʻtarildi. Medallarning asosiy manbai kurash va eshkak eshish boʻldi.
Toʻrt kunda yana oltita oltin. Oʻzbekiston Osiyo oʻyinlarida toʻrtinchi oʻringa koʻtarildi
25-28 sentyabr kunlari Oʻzbekiston terma jamoasi Aichi-Nagoyadagi Osiyo oʻyinlarida oʻz gʻaznasini yana 16 ta medal — 6 ta oltin, 5 ta kumush va 5 ta bronza bilan boyitdi. 28 sentyabr yakuniga koʻra, delegatsiya hisobida 42 ta sovrin — 12 ta oltin, 17 ta kumush va 13 ta bronza bor edi. Oʻzbekiston umumiy hisobda toʻrtinchi oʻringa koʻtarildi.
Ushbu toʻrt kun ichida medallarning asosiy qismini baydarka va kanoeda eshish, shuningdek, kurash sport turlari taqdim etdi — har birida oltitadan sovrin.
Eshqoqchilar 25-26 sentyabr kunlari bitta oltin va beshta kumush medalni qoʻlga kiritgan boʻlsa, kurashchilar 27-28 sentyabr kunlari toʻrtta oltin va ikkita bronzaga egalik qilishdi. Yana ikkita sovrinni yengil atletikachilar, bittadan medalni esa sport gimnastikasi va qilichbozlik vakillari qoʻshib qoʻyishdi.
Musobaqaning oltinchi kuni Oʻzbekistonga beshta medal — bitta oltin, uchta kumush va bitta bronza keltirdi. Kumush medallarning barcha uchtasi baydarka va kanoeda eshish bahslarida qoʻlga kiritildi.
Ayollar oʻrtasida 500 metr masofaga toʻrt kishilik baydarkada Yekaterina Shubina, Arina Tanatmisheva, Milana Dushev-Yanich va Shahrizoda Mavlonova ikkinchi boʻlishdi.
Yana bir kumushni Vladlen Denisov 500 metrga bir kishilik kanoeda qoʻlga kiritdi. Bu u uchun Oʻyinlardagi ikkinchi sovrin boʻldi: bir kun avval u Artur Guliyev bilan birga xuddi shu masofaga ikki kishilik kanoeda ikkinchi boʻlgan edi.
Kunning uchinchi kumush medalini Shohsanam Sherzodova va Nilufar Zokirova ayollar oʻrtasida 500 metrga ikki kishilik kanoeda taqdim etishdi. Sherzodova uchun ham bu Osiyo oʻyinlaridagi ikkinchi sovrin boʻldi: avvalroq u 200 metrga bir kishilik kanoeda oltin medalni qoʻlga kiritgan edi.
Sport gimnastikasida Rasuljon Abdurahimov parallel bruslardagi mashqlarda bronza medaliga sazovor boʻldi. Finalda u 14,433 ball jamgʻardi.
Kunning oltin medalini bosqon uloqtiruvchi Suhrob Xoʻjayev qoʻlga kiritdi. Uning eng yaxshi natijasi 74,38 metrni tashkil etdi. Bu sportchi uchun Osiyo oʻyinlaridagi ilk oltindir: 2018 yilda Jakartada u 74,06 metr natija bilan uchinchi boʻlgan, 2023 yilda Xanchjoudagi Osiyo oʻyinlarida esa bosqonni 70,79 metrga uloqtirib, yana bronza olgan edi.
25 sentyabrdan keyin Oʻzbekiston hisobidagi medallar soni 31 taga yetdi — 7 ta oltin, 15 ta kumush va 9 ta bronza.
26 sentyabr kuni Oʻzbekistonning barcha uchta medalini baydarka va kanoeda eshish vakillari keltirishdi — bitta oltin va ikkita kumush.
Shahriyor Mahkamov 500 metr masofaga bir kishilik baydarkada Osiyo oʻyinlari chempioni boʻldi. Bu uning Osiyo oʻyinlaridagi ilk oltinidir. Avvalroq Mahkamov 2018 yilgi Oʻyinlarning bronza va Xanchjoudagi Osiyo oʻyinlarining kumush medalini qoʻlga kiritgan edi.
Ayollar oʻrtasida 500 metrga bir kishilik baydarka poygasida Arina Tanatmisheva kumush medalni qoʻlga kiritdi. Ushbu sovrin u uchun Oʻyinlardagi uchinchisi boʻldi: 24 sentyabrda u Yekaterina Shubina bilan birga 500 metrga K2 bahslarida bronza, 25 sentyabrda esa toʻrt kishilik baydarka tarkibida kumush olgan edi.
Yana bir kumushni Vladlen Denisov va Nilufar Zokirova 500 metrga aralash ikki kishilik kanoeda qoʻlga kiritishdi. Shu tariqa, Denisov uch kun ichida shohsupaga uch marta koʻtarildi: u erkaklar oʻrtasida ikki kishilik va bir kishilik kanoeda 500 metrga bahslarda ham kumush olgan edi.
Uch musobaqa kuni ichida — 24-26 sentyabr kunlari — baydarka va kanoeda eshish Oʻzbekistonga jami toʻqqizta medal keltirdi: ikkita oltin, oltita kumush va bitta bronza. 26 sentyabr yakuniga koʻra, terma jamoaning umumiy natijasi 34 ta sovringa yetdi — 8 ta oltin, 17 ta kumush va 9 ta bronza.
Yettinchi kun kurash boʻyicha musobaqalarning muvaffaqiyatli boshlanishi bilan yodda qoldi. 27 sentyabr kuni ushbu sport turi vakillari ikkita oltin va bitta bronza medalini qoʻlga kiritishdi. Yana bir bronzani qilichbozlikning sablya yoʻnalishi boʻyicha ayollar terma jamoasi qoʻlga kiritdi.
90 kg dan yuqori vazn toifasida yarim finalda Oʻzbekistonning ikki vakili toʻqnash keldi. Shohruhxon Baxtiyorov Bekmurod Oltiboyevni magʻlub etdi, Oltiboyev yakunda bronza medaliga ega boʻldi. Finalda Baxtiyorov Tojikiston vakili Shakarmamad Mirmamadovdan ustun kelib, Osiyo oʻyinlari chempioniga aylandi. Uning sovrini Oʻzbekistonning Oʻyinlardagi oʻninchi oltini boʻldi.
Ayollar oʻrtasida 57 kg gacha boʻlgan vazn toifasida Ibodatxon Agojonova oltin medalni qoʻlga kiritdi. Finalda u Xitoy Taybeyi sportchisini magʻlub etdi.
Sablyachi qizlarning jamoaviy bahslarida Zaynab Dayibekova, Fernanda Errera, Guliston Perdibayeva va Samira Shokirova bronza medalini qoʻlga kiritishdi. Yarim finalda Oʻzbekiston Yaponiyaga 33:45 hisobida imkoniyatni boy berdi.
Ushbu natija ikki terma jamoa oʻrtasidagi raqobat tarixi bilan ham eʼtiborlidir. Xanchjoudagi avvalgi Osiyo oʻyinlarida aynan Oʻzbekiston va Yaponiya finalda toʻqnash kelishgan edi. Oʻshanda oʻzbekistonlik sablyachi qizlar 45:42 hisobida gʻalaba qozonib, mamlakatga qilichbozlik boʻyicha Osiyo oʻyinlari tarixidagi ilk oltinni keltirishgan edi.
27 sentyabr yakunlariga koʻra, terma jamoa hisobida 38 ta medal bor edi — 10 ta oltin, 17 ta kumush va 11 ta bronza.
Ertasi kuni kurash terma jamoaga yana uchta sovrin keltirdi. Ayollar oʻrtasida 78 kg gacha boʻlgan vaznda Oʻzbekistonning ikki vakili yarim finalda oʻzaro toʻqnash keldi: Pokizaxon Kamoliddinova Shohista Nazarovani magʻlub etdi. Nazarova bronza oldi, Kamoliddinova esa finalga yoʻl oldi va u yerda Janubiy Koreya sportchisini yengib, Osiyo oʻyinlari chempioni boʻldi.
Yana bir oltinni 81 kg gacha boʻlgan vazn toifasida Ahror Ziyodullayev qoʻlga kiritdi. Hal qiluvchi bahsda u eronlik Ramin Ahmadzodani magʻlub etdi. Bu sovrin Oʻzbekiston terma jamoasining 12-oltini boʻldi.
Shu tariqa, kurash boʻyicha ikki kunlik musobaqalarda oʻzbekistonliklar oltita medal — toʻrtta oltin va ikkita bronzani qoʻlga kiritishdi. Ushbu sport turida terma jamoa qaydnomasiga kiritilgan yetti nafar sportchidan olti nafari shohsupaga koʻtarildi.
Oʻzbekistonning 28 sentyabrdagi soʻnggi medali yengil atletikachi Anvar Anvarovning bronzasi boʻldi. U uzunlikka sakrashda 8,06 metr natija koʻrsatib, uchinchi oʻrinni egalladi.
Toʻqqizinchi musobaqa kuni yakuniga koʻra, Oʻzbekiston hisobida 42 ta medal — 12 ta oltin, 17 ta kumush va 13 ta bronza bor edi. Bunday natija bilan terma jamoa Xitoy, Yaponiya va Janubiy Koreyadan keyin toʻrtinchi oʻrinda borayotgan edi. Qozogʻiston mutlaq koʻrsatkich boʻyicha koʻproq sovringa ega edi — 45 ta, biroq beshinchi oʻrinda joylashgan edi, chunki medallar jadvalida avvalo oltin medallar soni hisobga olinadi: Oʻzbekistonda 12 ta, Qozogʻistonda esa 9 ta.