Tinchlik boʻyicha Nobel mukofoti janubiy afrikalik sudyaga berildi
U tinchlik va xalqaro huquqni taʼminlash yoʻlidagi saʼy-harakatlari uchun taqdirlandi.
Tinchlik boʻyicha Nobel mukofoti janubiy afrikalik sudyaga topshirildi
Osloda tinchlik boʻyicha Nobel mukofoti sovrindori maʼlum qilindi. Bu yil Navanethem (Navi) Pilley «tinchlik va xalqaro huquqni targʻib qilishdagi saʼy-harakatlari uchun» taqdirlandi.
Pilley xonim avvalroq BMTning Ruanda boʻyicha Xalqaro jinoiy tribunalida faoliyat yuritgan, jumladan, tribunal raisi ham boʻlgan. U 2003-yildan 2008-yilgacha Xalqaro jinoyat sudi (XJS) sudyasi sifatida ishlagan. 2008–2014-yillarda esa BMTning Inson huquqlari boʻyicha oliy komissari lavozimini egallagan.
Joriy yilda diplomatiya va gumanitar faoliyat sohasidagi ushbu nufuzli mukofotga 287 nafar shaxs va tashkilot nomzod qilib koʻrsatilgan edi.
Nomzodlar roʻyxati 50 yil davomida maxfiy saqlanadi, shu sababli jamoatchilik unda Donald Trampning nomi bor-yoʻqligini hali uzoq vaqt bilolmaydi: u bir necha yildan beri oʻziga shunday mukofot berilishini soʻrab keladi.
AQSH prezidenti «sakkizta urushga chek qoʻygani»ni va mukofotga eng munosib inson ekanini taʼkidlaydi.
«Ular mendaylarga mukofot bermaydigan odamlar. Va menimcha, bu ularni obroʻsizlantiradi. Men buni nafrat yuzasidan aytayotganim yoʻq», – dedi Tramp shu kunlarda ham bu mavzuga qaytib.
Manbalarga koʻra, Oslodagilar Eronga qarshi boshlangan urush, hududiy daʼvolar, xususan, Grenlandiyaga oid daʼvolar, muhojirlarga nisbatan qatʼiy siyosat, shuningdek, xalqaro hamkorlik va ommaviy axborot vositalariga hujumlari sabab Amerika prezidentini munosib nomzod deb hisoblamaydi.
Shu bilan birga, Tramp Nobel qoʻmitasining oltin medaliga ega. 2025-yilda tinchlik boʻyicha Nobel mukofotini olgan venesuelalik muxolifatchi Mariya Korino Machado oʻz medalini unga bergan edi.
U Venesuela prezidenti Nikolas Maduro Amerika kuchlari tomonidan qoʻlga olinganidan keyin Trampni mukofotga loyiq deb topgan edi. Biroq buning evaziga u Oq uyning siyosiy qoʻllab-quvvatloviga erisha olmadi.
Har bir Nobel mukofoti diplom, oltin medal va 1,2 million dollar miqdoridagi pul mukofotini oʻz ichiga oladi.