Timur Ismailov ichki ishlar vazirining birinchi o‘rinbosari etib tayinlandi
Timur Ismailov O‘zbekiston ichki ishlar vazirining birinchi o‘rinbosari — Jamoat xavfsizligi departamenti boshlig‘i lavozimiga tayinlandi. U bungacha Surxondaryo viloyati IIB boshlig‘i lavozimida ishlagan. IIV rahbarining sobiq o‘rinbosari Bekmurod Abdullayev 2025-yil noyabrida ishdan olingandi, u sud qilinmoqda.
Timur Ismailov Ichki ishlar vazirining birinchi o‘rinbosari lavozimiga tayinlandi.
O‘zbekiston Prezidentining tegishli qaroriga asosan, polkovnik Timur Kamalitdinovich Ismailov Ichki ishlar vazirining birinchi o‘rinbosari — Jamoat xavfsizligi departamenti boshlig‘i etib tayinlandi. Bu haqda vazirlik matbuot xizmati ma’lum qildi.
U ushbu tayinlov munosabati bilan Surxondaryo viloyati IIB boshlig‘i lavozimidan ozod etildi.
Eslatib o‘tamiz, IIV rahbarining avvalgi birinchi o‘rinbosari Bekmurod Abdullayev 2025-yil noyabrida lavozimidan chetlatilgan edi.
26-yanvar kuni esa uning va Jazoni ijro etish departamentining sobiq boshlig‘i Rustam Tursunovning hibsga olingani ma’lum bo‘ldi.
Prezident Shavkat Mirziyoyev 27-yanvar kuni bo‘lib o‘tgan yig‘ilishda Ichki ishlar vazirligi tizimidagi davlat xaridlarida budjet mablag‘larini o‘zlashtirish holatlari aniqlanganini ma’lum qilgan edi. Uning so‘zlariga ko‘ra, 186 milliard so‘mlik mablag‘ talon-toroj qilingan. Davlat rahbari Bekmurod Abdullayev va Rustam Tursunovga nisbatan jinoyat ishlari qo‘zg‘atilganini ta’kidlagan.
28-iyul kuni sudda Bekmurod Abdullayev, Rustam Tursunov va yana 28 nafar shaxsga nisbatan qo‘zg‘atilgan jinoyat ishini ko‘rib chiqish boshlanadi. Keyinroq sud yopiq tarzda o‘tkazilishi ma’lum bo‘ldi.