Tim Kuk Apple aktsiyalarini 63,8 million dollarga sotdi

3 soat oldin

Apple ijrochi raisi va kompaniyaning sobiq bosh direktori Tim Kuk Apple’ning 191,7 ming dona aktsiyasini deyarli 63,9 million dollarga sotdi. Bitimlar bir dona aktsiya uchun 330,66 dollardan 334,50 dollargacha boʻlgan narxda amalga oshirildi.

Sotuv Kuk oʻz mukofotlash dasturi doirasida 374,5 ming dona aktsiya olganining ertasi kuni yuz berdi. Gap xodimlar muayyan shartlarni bajarganda oladigan cheklangan aktsiyalar (RSU) haqida bormoqda.

Kukning holatida bunday aktsiyalar soni Apple’ning uch yillik natijalari S&P 500 indeksiga kiruvchi boshqa kompaniyalar bilan solishtirilganda qanday boʻlganiga bogʻliq edi. Aktsiyalar hisoblanganidan keyin Apple soliqlarni toʻlash uchun ularning deyarli 200 mingtasini ushlab qoldi.

Bundan tashqari, 2 oktyabr kuni Kuk yana 26,3 ming dona aktsiyani boshqa shaxs yoki tashkilotga oʻtkazib berdi. Hujjatlarda qabul qilib oluvchi koʻrsatilmagan.

Aktsiyalar sotilishi Kuk tomonidan may oyida tasdiqlangan maxsus savdo rejasi doirasida oldindan rejalashtirilgan edi. Bunday rejalar rahbarlarga bitimlar shartlarini oldindan belgilab qoʻyish va sotish toʻgʻrisidagi qarorni bevosita operatsiya kunida qabul qilmaslik imkonini beradi.

Sotuv, soliqlar toʻlanishi va oʻz trasti orqali aktsiyalar hadya qilinishidan keyin ham Kukga hali ham Apple’ning 3,2 milliondan ortiq aktsiyasi tegishli.

Tim Kuk 15 yil davomida kompaniyani boshqarganidan soʻng, 2026 yil 1 sentyabrda Apple bosh direktori lavozimidan ketdi. Uning oʻrnini Jon Ternus egalladi, Kuk esa Apple’dagi faoliyatini direktorlar kengashining ijrochi raisi sifatida davom ettirdi.