Tesla yangi Roadster sportkarini taqdim etadi
Tesla qariyb toʻqqiz yil avval namoyish etilgan Roadster elektr sportkarining yangi avlodini yana bir bor koʻrsatishga tayyorlanmoqda. Biroq taqdimotdan keyin avtomobil qachon ishlab chiqarilishi va xaridorlarga yetkazib berilishi hozircha nomaʼlum.
Tesla yangi Roadster sportkarini namoyish etadi
Tesla (AQSH) kompaniyasi 15-oktabr kuni Roadster elektr sportkarining yangi avlodini taqdim etadi.
Bu taqdimot dastlab ishlab chiqarilishi 2020-yildayoq boshlanishi rejalashtirilgan model ilk bor ko‘rsatilganidan qariyb to‘qqiz yil o‘tib o‘tkazilishi ko‘zda tutilgan.
Tesla bo‘lajak taqdimot haqida ijtimoiy tarmoqlarda ma’lum qildi. Roadster sportkarining ikkinchi avlodi ilk marta 2017-yil noyabrida namoyish etilgan edi. O‘shanda Tesla ushbu avtomobil 97 km/soat tezlikka 1,9 soniyada chiqishi, soatiga 400 kilometrdan ortiq tezlikda harakatlana olishi hamda bir quvvatlanishda 998 km gacha masofa bosib o‘tishini bildirgandi. Biroq bu ko‘rsatkichlar dastlab e’lon qilingan versiyaga tegishli bo‘lib, seriyali avtomobil uchun hali tasdiqlanmagan.
Loyihaning eng diqqatga sazovor jihatlaridan biri SpaceX texnologiyasiga ega maxsus versiya bo‘lishi mumkin. Avvalroq Tesla rahbari Ilon Mask avtomobilga favqulodda imkoniyatlar berishi kutilayotgan kichik tortish kuchiga ega gaz dvigatellaridan foydalanish ehtimoli haqida gapirgan edi. Namoyishda odatiy avtomobil taqdimoti doirasidan chiqadigan unsurlar bo‘lishi kutilmoqda. Shu bilan birga, bunday versiyaning aniq xususiyatlari va imkoniyatlari hali rasman tasdiqlanishi kerak.
Taqdimotga tayyorgarlik muddatlarning surilishi bilan ham kechdi. Dastlab tadbir 1-oktabrga belgilangan edi, biroq Tesla noqulay ob-havo prognozi sabab uni 15-oktabrga ko‘chirdi. Kompaniya buni namoyishni faqat ochiq havoda o‘tkazish mumkinligi bilan izohladi.
Ko‘p yillik kutishlarga qaramay, ishlab chiqarish boshlanishi va xaridorlarga yetkazib berish muddatlari borasida hanuz savollar ochiq qolmoqda. Shu bois bo‘lajak taqdimot Tesla 2017-yilda ilk bor ommaga ko‘rsatgan loyihani amalga oshirishda qanchalik oldinga siljiganini tekshiruvchi muhim sinovga aylanadi. Taqdimotning o‘zi esa seriyali ishlab chiqarish tez orada boshlanishini anglatmaydi.