Tesla seriyali Cybercab’ni namoyish etdi, bunday mashinalar atigi 45 dona
Tesla avtonom harakatlanish uchun moʻljallangan ikki oʻrinli elektromobil - Cybercab’ning yopiq namoyishini oʻtkazdi. Mashina rul va pedallarsiz boʻlib, avtopilot tizimlari yordamida boshqariladi.
Tesla seriyali Cybercab’ni taqdim etdi, bunday mashinalar soni atigi 45 ta
Tesla Ostin shahrida haydovchisiz Cybercab avtomobilining yopiq namoyishini oʻtkazdi. Bu brend ilk bor 2024-yilda koʻrsatgan ikki oʻrinli elektromobildir.
Mashina «chayka qanoti» uslubidagi eshiklar va avtonom harakatlanish uchun sakkizta kamera bilan jihozlangan. Shu bilan birga, unda anʼanaviy boshqaruv vositalari — rul chambaragi, pedallar va yon koʻzgu oynalari yoʻq. Shuningdek, Tesla bir qator raqobatchilar foydalanadigan radar va lidardan ham voz kechgan.
Tesla maʼlumotiga koʻra, Cybercab allaqachon Robotaxi xizmati doirasida sinovdan oʻtkazilmoqda. Texasda shunday 45 ta avtomobil roʻyxatga olingan, biroq kompaniya hozircha ularning qanchasi tijoriy qatnovlarga jalb etilishini aniqlashtirmagan.
Hozirda Tesla Model Y bazasidagi robotaksilarni rivojlantirishni davom ettirmoqda. Robotaxi Tracker maʼlumotlariga koʻra, kompaniya oltita shaharda haydovchining doimiy nazoratisiz jami 256 ta avtonom avtomobildan foydalanadi. Taqqoslash uchun, Waymo 14 ta shaharda qariyb 4 mingta mashinani ishlatadi.
Cybercab’ning seriyali sotuvi hali boshlanmagan. Avvalroq kompaniya egasi Ilon Mask avtomobil narxi taxminan 30 ming dollar boʻlishi mumkinligini aytgan edi, biroq Tesla hozirgacha uning bozorga chiqish sanasini eʼlon qilmagan.
Cybercab 219 ot kuchiga ega doimiy magnitli bitta elektr motor va old uzatmalar qutisi bilan jihozlangan. Batareya sigʻimi — 48 kVt·soat. Taksi bir quvvatlanishda 673 km gacha masofani bosib oʻta oladi.