Tehron Hoʻrmuz boʻgʻozida kemalar uchun jazo choralarini kuchaytirmoqda
Eron Hoʻrmuz boʻgʻozidan oʻtish qoidalarini buzgan kemalarga nisbatan jarima solish, ularni ushlab turish va hatto musodara qilish choralarini qoʻllash mumkinligini maʼlum qildi. Tehron qoidabuzar deb hisoblayotgan kemalar roʻyxatini ham eʼlon qilgan. Bu bayonot AQSH Hoʻrmuz orqali neft tashish uchun maxfiy dengiz yoʻlagini tashkil etgani haqidagi xabarlar fonida yangradi.
Tehron Hormuz boʻgʻozida kemalarga nisbatan jazo choralarini kuchaytirmoqda.
Eron Hormuz boʻgʻozidan oʻtish qoidalariga rioya qilmagan kemalarga nisbatan cheklovlarni kuchaytirishini eʼlon qildi.
23-avgust kuni Eronning Fors koʻrfazi boʻgʻozlari maʼmuriyati (PGSA) ijtimoiy tarmoqda tarqatgan bayonotida, qoidabuzar kemalar keyingi safar Hormuz boʻgʻozidan oʻtishda turli cheklovlarga duch kelishi mumkinligini bildirdi. Xususan, bunday kemalarga jarima solish, ularni ushlab turish va ayrim hollarda musodara qilish choralari qoʻllanilishi mumkinligi aytilgan.
Eron tomoni, shuningdek, Fors koʻrfazi akvatoriyasiga yoki undan tashqariga yuk tashish bilan shugʻullanuvchi kompaniyalarni kemani ijaraga olishdan oldin qoidabuzarlar roʻyxatini tekshirishga chaqirdi. Tegishli internet sahifasida Tehron Hormuz boʻgʻozidan oʻtish talablarini buzgan deb hisoblayotgan kemalar roʻyxati ham eʼlon qilingan.
Avvalroq, 19-avgust kuni Axios nashri AQSH Qurolli kuchlari Hormuz boʻgʻozi orqali kemalar harakatini taʼminlash uchun maxfiy dengiz yoʻnalishini tashkil etgani haqida xabar bergan edi. Nashr maʼlumotlariga koʻra, Ummon sohillari yaqinidagi janubiy kanal orqali har kecha 15–20 ta tanker harakatlanmoqda. Ular orqali jahon bozoriga kuniga qariyb 10 million barrel neft yetkazib berilayotgani aytilgan. Bu urushdan oldin Hormuz boʻgʻozi orqali tashilgan neft hajmining taxminan yarmiga teng.
Axios AQSH prezidenti Donald Tramp maʼmuriyati rasmiylariga tayanib, ushbu yetkazib berishlar jahon neft bozoriga "sezilarli taʼsir" koʻrsatayotganini yozgan.
Bundan avval AQSH prezidenti Donald Tramp Eronga qarshi keng koʻlamli iqtisodiy bosim boshlanganini eʼlon qilgan edi. U Tehronni qoʻllab-quvvatlaydigan yoki Eron bilan biznes aloqalarini davom ettiradigan har qanday davlatga nisbatan katta miqdordagi sanksiyalar joriy qilinishi mumkinligini aytgan. Tramp, shuningdek, ayni paytda Vashington va Tehron oʻrtasida muzokaralar olib borilmayotganini taʼkidlagan.