“Tashabbusli byudjet”da yana 417 ta loyiha gʻolib boʻldi

“Tashabbusli byudjet”da yana 417 ta loyiha gʻolib deb topildi

Iqtisodiyot va moliya vazirligi maʼlumotiga ko‘ra, Oliy Majlis Qonunchilik palatasi deputatlari tomonidan 346 ta loyiha qoʻshimcha gʻolib sifatida tan olingan. Ushbu loyihalarni moliyalashtirish uchun jami 240,3 mlrd soʻm ajratildi.

Xalq deputatlari tuman (shahar) kengashlari qarorlariga asosan, mahalliy byudjetning qoʻshimcha mablagʻlari hisobidan yana 71 ta loyiha qoʻshimcha gʻolib deb eʼlon qilindi. Bu loyihalarni moliyalashtirish uchun jami 101,0 mlrd soʻm yoʻnaltirildi.

Maʼlumot uchun: amaldagi tartibga binoan, xalq deputatlari tuman (shahar) kengashlari mahalliy byudjetning qoʻshimcha mablagʻlari hisobidan navbatdagi loyihalarni qoʻshimcha tarzda gʻolib deb eʼlon qilish vakolatiga ega.

Shu tariqa, joriy yilgi 2-mavsum yakunlariga ko‘ra, umumiy qiymati 3,3 trln soʻm bo‘lgan jami 2 612 ta loyiha gʻolib deb topildi.