“Tashabbusli byudjet”da ovoz uchun pul va’da qilayotganlar ko‘paydi. Vazirlik ogohlantirish bilan chiqdi

"Tashabbusli byudjet" loyihasida ovoz berish evaziga pul va'da qiluvchilar soni ortib bormoqda. Shu munosabat bilan vazirlik ogohlantirish bilan chiqdi.

Ijtimoiy tarmoqlarda "Tashabbusli byudjet" doirasida ovoz berish uchun pul mukofoti taklif qiluvchi norasmiy Telegram botlari ko'payib ketdi.

Iqtisodiyot va moliya vazirligiga va'da qilingan mablag'lar berilmayotgani yuzasidan yuzlab murojaatlar kelib tushgani ma'lum qilindi.

Vazirlikning ta'kidlashicha, ayrim uchinchi shaxslar loyihalarga ovoz to'plash maqsadida fuqarolarga pul yoki boshqa moddiy qimmatliklarni va'da qilmoqda. Biroq, keyinchalik va'da qilingan mukofotlar berilmayotgani kuzatilmoqda.

Qayd etilishicha, "Tashabbusli byudjet" doirasida ovoz berish faqat "Ochiq byudjet" axborot portali, uning Android va iOS mobil ilovalari hamda Telegram'dagi rasmiy boti orqali amalga oshiriladi.

Amaldagi tartibga ko'ra, ovoz berish uchun fuqarolardan pul undirilmaydi va berilgan ovozlar uchun moddiy rag'batlantirish ham nazarda tutilmagan.

Ovoz berish jarayoni 31-avgust kuni soat 23:59 gacha davom etadi. Vazirlik fuqarolarni norasmiy botlardan foydalanmaslikka, shaxsiy ma'lumotlarini begona shaxslarga bermaslikka va firibgarlardan ehtiyot bo'lishga chaqirdi.

Eslatib o'tamiz, "Tashabbusli byudjet"ning 2026-yil 2-mavsumida Farg'ona shahrining ovoz berish bosqichidagi ishtiroki vaqtincha cheklangandi. Bunga ayrim loyihalarning ishchi komissiya tomonidan asossiz ravishda rad etilgani sabab bo'lgan.