Taqiq qo‘yilgan uyga MyGov orqali ro‘yxatdan o‘tish mumkin bo‘ldi
MyGov portalida taqiq yoki xatlov qo‘yilgan turar joyga garovga oluvchining roziligisiz doimiy yashash joyi yoki vaqtincha turgan joyi bo‘yicha ro‘yxatdan o‘tish xizmati ishga tushirildi.
Endilikda fuqarolar taqiqqa qo‘yilgan uyda ro‘yxatdan o‘tish uchun MyGov portali orqali onlayn ariza topshirishlari mumkin.
Bu yangilik vatandoshlarni garovga oluvchining roziligini olish, pasport stoliga borish va navbat kutish kabi ortiqcha ovoragarchiliklardan xalos etadi. Barcha jarayonlarni endi uydan chiqmagan holda, my.gov.uz sayti orqali amalga oshirish imkoniyati yaratildi.
Ushbu xizmatdan foydalanish uchun MyGov portaliga kirib, tegishli xizmat nomini qidirish kifoya.
**Eslatma:** Mulkdor, garovga oluvchi yoki taqiq qo‘yish/bekor qilishga mas’ul organning ichki ishlar organlariga murojaati asosida fuqaroning ro‘yxatdan o‘tkazilganligi bekor qilinishi mumkin.
Mazkur qulaylik O‘zbekiston Respublikasi Prezidentining 2026-yil 15-iyuldagi PQ-265-sonli qaroriga muvofiq joriy etilgan.