Tadqiqot: qizil go‘shtni ko‘p iste’mol qilish diabetga sabab bo‘lishi mumkin
Tadqiqotchilar Fransiyaning NutriNet-Santé tadqiqotida 89 953 nafar ishtirokchining ma’lumotlarini tahlil qilishdi. Tadqiqot boshida ularda 2-toifa
**Tadqiqot: qizil go‘shtni ko‘p iste’mol qilish diabet xavfini oshirishi mumkin**
Qizil go‘shtni ko‘p yeyish 2-toifa diabet rivojlanish ehtimolini oshirishi mumkin. Olimlar bunga go‘sht tarkibidagi Neu5Gc shakar molekulasi sabab bo‘lishi ehtimolini aniqlashdi. Tadqiqot natijalari Yevropa Diabetni o‘rganish assotsiatsiyasining (EASD) yillik konferensiyasida taqdim etildi.
Tadqiqotchilar Fransiyadagi NutriNet-Santé tadqiqotida qatnashgan 89 953 nafar ishtirokchi ma’lumotlarini tahlil qilishdi. Tadqiqot boshlanganda ularda 2-toifa diabet ham, saraton ham yo‘q edi. Keyingi 7,2 yil davomida 966 kishida kasallik aniqlangan.
Olimlar ayniqsa mol go‘shti va qo‘y go‘shtida uchraydigan Neu5Gc shakar molekulasiga e’tibor qaratdilar. Inson organizmi uni ishlab chiqara olmaydi, shu sababli ratsion orqali qabul qilingan Neu5Gc immun tizimi tomonidan begona modda sifatida qabul qilinib, surunkali yallig‘lanishni qo‘zg‘atishi mumkin.
Qizil go‘shtdan Neu5Gc ni eng ko‘p iste’mol qilganlarda diabet rivojlanish xavfi uni eng kam iste’mol qilganlarga nisbatan 63 foiz yuqori bo‘lgan. Ikkinchi eng yuqori iste’mol guruhida esa xavf 41 foizga oshgan. Jismoniy faollik, ovqatlanish, chekish va boshqa omillar hisobga olinganidan keyin ham bu bog‘liqlik saqlanib qolgan.
Biroq, sut mahsulotlaridan olingan Neu5Gc bo‘yicha shunga o‘xshash bog‘liqlik aniqlanmadi. Mualliflar tadqiqot kuzatuv xarakteriga ega ekanini ta’kidlab, u qizil go‘shtning diabetga bevosita sabab bo‘lishini isbotlamasligini aytishadi.