Tadbirkorlarga Mustaqillik bayrami tuhfasi: turizm sohasida bir qator yangi imtiyozlar joriy etildi
Yaqinda Prezident Shavkat Mirziyoyevning tadbirkorlar bilan VI ochiq muloqotida turizm sohasidagi tadbirkorlarga bir qator imtiyozlar
Mustaqillik bayrami arafasida tadbirkorlarga turizm sohasida bir qator yangi imtiyozlar taqdim etildi.
Prezident Shavkat Mirziyoyevning tadbirkorlar bilan VI ochiq muloqotida e’lon qilingan ushbu imtiyozlar 2026-yil 27-avgustda imzolangan PF-175-sonli Farmonda o‘z aksini topdi.
Unga ko‘ra, tijorat banklari mehmonxona qurish va rekonstruksiya qilish uchun 10 yilgacha muddatga, 2 yillik imtiyozli davr bilan, milliy valyutada yillik 16 foizli kreditlar ajratadi. Xorijiy valyutadagi kreditlar uchun SOFR, EURIBOR yoki SHIBOR stavkalaridan oshgan foiz xarajatlari "Tadbirkorlikni rivojlantirish kompaniyasi" AJ tomonidan qoplanadi.
Turizm infratuzilmasini rivojlantirish maqsadida, uch, to‘rt va besh yulduzli mehmonxonalarni qurish subsidiyasi 2029-yil 1-yanvargacha uzaytirildi. Shuningdek, yulduzli mehmonxona subsidiyasi uchun toifani tasdiqlashda xorijiy kompaniya xulosasi talab etilmaydi. Ma’lumot uchun, so‘nggi 3 yilda 32 ta yulduz toifasiga ega mehmonxona qurilib, ularga davlat budjetidan 156 milliard so‘mdan ortiq subsidiya to‘lab berilgan.
Mehmonxonalarning mol-mulk va yer solig‘iga 0,1 koeffitsiyent qo‘llash muddati 2030-yil 1-yanvargacha uzaytirildi. Mehmonxona, shu jumladan palatka va o‘tovli lagerlari uchun yer va mol-mulk solig‘ining 90 foizga kamaytirilishi 2030-yil (lagerlar uchun 2037-yil) 1-yanvargacha amal qiladi.
Turizm subyektlari uchun import qilinadigan avtobus, elektrobus va mikroavtobuslarni bojxona bojidan ozod etish muddati 2028-yil 1-yanvargacha uzaytirildi. Sakkizdan ortiq o‘rindiqli mikroavtobuslar ham ushbu imtiyozga kiritilib, ular utilizatsiya yig‘imidan ham ozod etildi.
Turoperatorlarning xorijiy sayyohlarga ko‘rsatgan xizmati eksportga tenglashtirilib, 2027-yil 1-yanvardan QQSdan ozod etilmoqda.
Mehmonxona va umumiy ovqatlanish subyektlari suv, ichimlik, pivo va tamaki mahsulotlari xarid qilganda, ularga biriktirilgan raqamli markirovka kodlari yakuniy iste’molga realizatsiya qilingan deb hisoblanadi – qayta sotish nazorati talab etilmaydi. Shuningdek, 2026–2027-yillarda bosqichma-bosqich 50 tadan ortiq xonali mehmonxonalarda naqd valyuta ayirboshlash shoxobchalari va bankomatlari tashkil etiladi.
Shu bilan birga, 2026-yil noyabrgacha turistik yig‘imni joylashish narxiga qarab qayta belgilash, mehmonxonalar uchun avtoturargoh tashkil etish talabi hamda 10 nafardan ortiq guruh olib keluvchi turoperatorlar uchun madaniy meros obyektlariga 30 foizgacha chegirmani nazarda tutuvchi Prezident qarori loyihasi ishlab chiqiladi. Ushbu takliflar hozircha loyiha bosqichida bo‘lib, tegishli Prezident qarori rasman qabul qilingach, yuqoridagi imtiyozlar tadbirkorlar uchun rasman kuchga kiradi.