Sud «Oʻzbekneftgaz»ning ekologik kompensatsiyasini 13 000 baravarga qisqartirdi
Qashqadaryo viloyati ekologiya boshqarmasi Shoʻrtan neft va gaz qazib chiqarish boshqarmasidan atrof-muhitni ifloslantirgani uchun 8,8 mlrd soʻm undirishni talab qilgan edi, biroq sud daʼvoning asosiy qismini rad etdi. Yakunda faqatgina 676 ming 133 soʻm undirilishi belgilandi.
Sud «Oʻzbekneftgaz»ning ekologik kompensatsiyasini 13 000 baravarga kamaytirdi
Sud nazorat organi tekshiruv predmeti doirasidan chiqib ketgan, talablarning asosiy qismi boʻyicha hisob-kitoblar esa yetarli dalillar bilan tasdiqlanmagan, degan xulosaga keldi. Bundan tashqari, qonun buzilishi bilan olingan dalillardan foydalanishga yoʻl qoʻyilmasligi inobatga olindi.
Eslatib oʻtamiz, aprel oyida Ekopolitsiya korxonada atmosfera havosini muhofaza qilish talablari buzilganini, chang-gaz tozalash uskunalari va oqova suvlarni tozalash inshootlari ekologik normalarga muvofiq emasligini aniqlagan edi. Oʻshanda korxonaga bajarilishi majburiy boʻlgan 16 ta koʻrsatma berilgan va qoʻshimcha kompensatsiya toʻlovlari belgilangan edi.