Sog‘lig‘ingiz yaxshi holatda ekanini anglatadigan 9 ta alomat
**Sog‘lom ekanligingizni bildiruvchi 9 ta alomat**
Biz ko‘pincha xavfli kasalliklarning belgilari va ogohlantiruvchi signallari haqida yozamiz, chunki organizm ularning yordamida muammo borligini bildiradi. Ammo bugun e’tiboringizni o‘zingizga juda yaxshi g‘amxo‘rlik qilayotganingizni ko‘rsatadigan ijobiy belgilarga qaratmoqchimiz, deb yozadi “Noviy ochag” nashri.
**1. Bosh og‘rig‘i deyarli bezovta qilmaydi yoki tez o‘tib ketadi**
Har bir inson vaqti-vaqti bilan stress yoki jismoniy zo‘riqish tufayli bosh og‘rig‘iga duch kelishi mumkin. Ammo agar bunday og‘riqlar tezda o‘tib ketsa, bu yaxshi belgi. Agar siz muntazam ravishda migrenlardan aziyat cheksangiz yoki kuchli, uzoq davom etadigan bosh og‘rig‘ini his qilsangiz, shifokorga murojaat qilish tavsiya etiladi.
**2. Oyoq-qo‘llaringiz uvushib qolmaydi**
Noqulay holatda uzoq o‘tirish yoki yotish qo‘l yoki oyoqlarning uvushib qolishiga sabab bo‘lishi mumkin. Agar qon aylanish tizimingiz yaxshi ishlasa, bu holat tezda bartaraf etiladi. Ammo agar bu alomatlar qisqa harakatsizlikdan keyin paydo bo‘lsa yoki uzoq vaqt davom etsa, bu asab tolalarining siqilishi yoki qon aylanishining buzilishidan dalolat berishi mumkin.
**3. Og‘izdan noxush hid kelmaydi**
Shifokorlar o‘ndan ortiq xavfli kasalliklarni og‘izdagi hid orqali aniqlashlari mumkin. Agar nafasingiz toza va hidsiz bo‘lsa, bu sizning sog‘lom ekanligingizdan dalolat beradi.
**4. Kun davomida barqaror energiya zaxirasiga egasiz**
Agar har kuni tushlik paytida charchoq his qilsangiz, bu ijobiy belgi emas. Bu buyrak usti bezlari faoliyatining buzilishi yoki qonda qand miqdorining pasayishi bilan bog‘liq bo‘lishi mumkin. Odatda biz ertalablari tetik bo‘lishimiz va kun davomida barqaror energiya darajasini saqlab turishimiz kerak. Agar bu sizga tegishli bo‘lsa, tabriklaymiz — sog‘lig‘ingiz joyida.
**5. Teringiz toza va sog‘lom ko‘rinishga ega**
Teri tanamizning ko‘plab kasalliklarni aks ettiruvchi qismidir. Agar teringiz bir tekis rangli, xira bo‘lmasa, husnbuzarlar paydo bo‘lishiga moyil bo‘lmasa va haddan tashqari quruq bo‘lmasa, siz ideal sog‘liq bilan maqtana olasiz.
**6. Kamida 48 soatda bir marta ichak harakati mavjud**
Muntazam ichak harakati odatda kuniga bir marta, bir vaqtning o‘zida sodir bo‘ladi. Ammo agar ichaklaringiz 48 soat yoki undan ko‘proq vaqt davomida "ishlamay qolsa", shifokorga murojaat qiling — bu jiddiy xavf bo‘lishi mumkin.
**7. Peshob rangi tiniq**
Buyrak sog‘lig‘ini baholashning eng oson yo‘li peshob rangiga qarashdir. Uning rangi tiniq bo‘lishi kerak, ammo butunlay shaffof emas va albatta, qon aralashmalarisiz.
**8. Til toza va pushti rangda**
Sog‘lig‘ingizni baholashning yana bir oson usuli — tilingizni ko‘zguda ko‘rish va uni diqqat bilan tekshirish. Och qizil yoki pushti rang — sog‘lom odamning tili shunday ko‘rinadi. Sizda shundaymi? Tabriklaymiz!
**9. Yiliga bir martadan ko‘p shamollamaysiz**
Albatta, hech qachon shamollamagan yaxshi, ammo bu har doim ham mumkin emas. Ammo agar siz yiliga ikki yoki uch marta yoki undan ko‘p virusli kasalliklarni "yuqtirsangiz", bu immunitetning pastligi, zaiflashgani yoki nafas olish allergiyasini ko‘rsatishi mumkin.