Sidneydagi Bondi-Bich hujumidan soʻng qurollangan politsiya patrullikni boshladi
Yangi politsiya boʻlinmasi oʻtgan yili Hanuka bayramida sodir boʻlgan halokatli otishma hujumiga javoban koʻrilgan xavfsizlik chorasidir.
Sidneyda Bondi-bichdagi hujumdan soʻng qurollangan politsiya patrullikni boshladi
Sidney koʻchalarida oʻtgan yili Bondi-bichda sodir boʻlgan otishmadan soʻng joriy etilgan xavfsizlikni kuchaytirish choralari doirasida ogʻir qurollangan politsiya xodimlari patrullik qilishni boshladi.
Qurolli javob qaytarish qoʻmondonligi (ARC) maxsus tayyorgarlikdan oʻtgan xodimlarni odamlar gavjum boʻlgan sayyohlik hududlariga joylashtiradi, u yerda ular uzun sopli miltiqlarni koʻtarib yurishadi — bu aksariyat aholi uchun noodatiy manzaradir.
Yangi Janubiy Uels politsiyasining bildirishicha, xodimlar, shuningdek, “jiddiy tahdidlar, jumladan, qurollangan hujumchilar bilan bogʻliq hodisalarning oldini olish, ularni bartaraf etish va ularga tezkorlik bilan javob qaytarish uchun” sport oʻyinlari kabi yirik tadbirlarda va ibodat joylarida boʻlishadi.
Dekabr oyida mashhur plyajda yahudiylarning Xanuka bayramini nishonlash tadbirida ikki nafar qurollangan shaxs oʻt ochgani oqibatida 15 kishi, jumladan, 10 yoshli qizcha halok boʻlgan edi.
Ushbu hujum Avstraliyada oxirgi deyarli 30 yil ichidagi eng koʻp odam oʻlimiga olib kelgan ommaviy otishma boʻldi va qurol toʻgʻrisidagi qonunlarga yirik oʻzgartirishlar kiritilishiga hamda nafratni targʻib qiluvchi bayonotlarga qarshi kurashning kuchayishiga olib keldi.
Aholidan biri ABC News tele kanaliga qurollangan politsiyaning borligi “vahimali” ekanini aytdi.
“Ular hamma joyda. U qurollar juda katta.”
Biroq boshqa bir ayol eshittirishda qurollangan politsiyani koʻrish uni xavfsiz his qilishiga sabab boʻlganini aytdi.
Yangi Janubiy Uels politsiyasining maʼlum qilishicha, ARC “Sidney boʻylab yaqqol koʻrinadigan holda maxsus transport vositalarini boshqarishi va miltiqlar koʻtarib yurishi” nazarda tutilgan.
Detektiv superintendant Endryu Evansning aytishicha, bundan maqsad “oddiy tamoyilga — inson hayotini saqlab qalishga asoslangan”.
14 dekabrdagi otishma Bosh vazir Entoni Albaneze hukumatiga juda katta bosim oʻtkazdi va antisemitizmga qarshi tezkor choralar koʻrish talablarini keltirib chiqardi.
Yahudiy jamoalari vaqt oʻtishi bilan 250 nafar xodimni oʻz ichiga oladigan yangi politsiya operatsiyasini mamnuniyat bilan kutib oldi, boshqalar esa inson huquqlarini himoya qilish uchun kafolatlar berishga chaqirdi.
“Hech bir avstraliyalik koʻchalarimizda harbiy qurolga ega xodimlarni koʻrishni xohlamaydi, ammo murda solingan qopchalarni koʻrish bundan ancha yomonroqdir”, dedi Avstraliya yahudiylari Ijroiya kengashi hamraisi Aleks Rivchin.
Amnesty International Australia tashkiloti “politsiyaning harbiylashtirilishi”dan xavotirda ekanini va shtat hukumatidan ARC tinch namoyishlarni bostirish uchun ishlatilmasligi boʻyicha kafolatlar soʻraganini bildirdi.
“Politsiya vakolatlari va imkoniyatlarining har qanday kengaytirilishi aniq, jamoatchilik uchun ochiq boʻlgan qoidalar, mustahkam mustaqil nazorat va hisobdorlik bilan birga olib borilishi kerak”, dedi tashkilot vakili Endryu Uitford.
Yangi Janubiy Uels hukumati yangi choralarni himoya qildi.
“Dunyoimiz abadiy oʻzgardi. Bu butun mamlakat boʻylab shunchaki haqiqatdir. Va men oʻsha paytda aytgan edim, biz hech qachon avvalgidek boʻlmaymiz”, dedi shtat Politsiya vaziri Yasmin Katli ABC telekanaliga.
Gumon qilinayotgan qurolli shaxslardan biri Navid Akramga 78 ta huquqbuzarlik, jumladan, 15 ta qotillik, 40 ta qotillikka suiqasd va bitta terrorchilik harakatini sodir etish boʻyicha ayblov qoʻyilgan.
Uning otasi, 50 yoshli Sajid Akram ham qurollangan boʻlib, Bondi-bichdagi olomonga qarata oʻt ochgan va voqea joyida politsiya tomonidan otib oʻldirilgan.