SI agentlari maishiy texnikalarni egallab olishga erishishi bashorat qilindi
Anthropic kompaniyasi 2026-yil oxiriga borib sunʼiy intellekt agentlari aqlli muzlatkichlar va changyutkichlar orqali oʻz-oʻzini koʻpaytirishni oʻrganib olishi mumkinligidan ogohlantirdi.
SI agentlari maishiy texnikalarni egallab olishi mumkinligi bashorat qilindi
Kichik SI modellari 2026-yil oxiriga borib, internetga ulangan maishiy elektronika va uy texnikalari orqali oʻz-oʻzini koʻpaytirishni oʻzlashtirishi ehtimoli bor.
Anthropic tadqiqotchilari shunday tajriba oʻtkazdi: har biri taxminan 55 dollar turadigan 15 ta Android-TV pristavkasi bitta tarmoqqa ulanib, unda 26 milliard parametrli SI modeli muvaffaqiyatli ishga tushirildi. Keyin mutaxassislar modellarning begona qurilmalarga mustaqil kirib borishi va yangi nusxalarini yaratish qobiliyatini sinovdan oʻtkazdi.
9 milliard parametrli model toʻqqiz turdagi uskunaning sakkiztasida ishga tushishni uddaladi, biroq u hozircha oʻz-oʻzini koʻpaytirishning toʻliq siklini barqaror bajara olmaydi. Bu vazifani faqat ancha yirikroq boʻlgan GLM-5.2 modeli bajara oldi, ammo uning ishlashi uchun robot-changyutkichlar va aqlli televizorlar bera oladiganidan ancha yuqori hisoblash quvvati kerak boʻladi.
Tadqiqotchilarning aytishicha, IoT-qurilmalar tarmoqlarida mustaqil koʻpayish uchun SI modeli nisbatan kam quvvat talab qilishi, shu bilan birga qurilmalarni mustaqil topish, oʻzini ularga koʻchirish va ishga tushirish qobiliyatiga ega boʻlishi lozim. Hozircha bu ikki shart bir paytda bajarilmayapti, ammo rivojlanishning amaldagi surʼati saqlansa, kichik modellar 2026-yil oxiriga kelib bunga erishadi.
Anthropic tahlilchilari SI agentlari uy qurilmalarini ancha sekin egallab oladi, degan xulosaga keldi. Tadqiqotchilar ularni koʻpayishi uchun bir necha sutka kerak boʻladigan mogʻor yoki meva pashshalariga qiyoslamoqda. Cheklangan quvvat sababli 9 milliard parametrli modelning bor-yoʻgʻi bitta yangi nusxasini koʻchirish va ishga tushirish taxminan ikki kun vaqt olishi mumkin.
Tadqiqotchilar kelajakda inson nazoratisiz ishlaydigan koʻplab SI agentlari paydo boʻlishi ehtimolini inkor etmayapti. Ulardan qutulish ancha qiyin boʻladi, chunki bu oʻz tarmoqlarida zararlangan qurilmalar aniqlangan barcha internet-provayderlar harakatlarini oʻzaro muvofiqlashtirishni talab etadi.