Shvetsiyada baliq ovi uchun chuvalchang qaziyotgan ayol 24 mingta kumush tanga topib oldi

Shvetsiyada baliq ovi uchun chuvalchang izlab yer kovlayotgan ayol 24 mingta kumush tanga topdi

Shvetsiyada bir ayol baliq ovi uchun chuvalchang qidirib yer qaziganida 24 100 dona kumush tanga topib oldi. Bu haqda mahalliy Raa nashri ma’lum qildi.

Shvetsiya hukumati mamlakat tarixiga oid ushbu yirik xazinani sotib oladi: ayolga 350 ming yevro beriladi.

Ayol xazinani Syodertelye munitsipaliteti hududidan topgan. Xazina tarkibida qariyb 24 100 dona kumush tanga hamda vikinglar davri va ilk o‘rta asrlarga oid yana 144 ta buyum bor. Topilmalar asosan kumushdan iborat, ammo ular orasida zarhal buyumlar va bir nechta oltin predmetlar ham mavjud.

Shvetsiya Milliy meros boshqarmasi ma’lumotiga ko‘ra, xazina yaxshi saqlangan va nihoyatda katta tarixiy ahamiyatga ega. Topilma tadqiqotchilarga Shvetsiya tarixidagi iqtisodiyot, savdo aloqalari va jamiyat tuzilishi haqida yangi ma’lumotlar berishi mumkin.

Xazinani topgan ayol bu haqda darhol rasmiylarga xabar bergan va qonunda belgilangan barcha talablarni bajargan.

“Mukofot puli adolatli bo‘lishi kerak. U topilmani aniqlagan shaxs manfaatlariga zarar yetkazmasligi, biroq noqonuniy xazina qidirishni rag‘batlantiradigan darajada yuqori ham bo‘lmasligi lozim”, deyiladi rasmiylar bayonotida.