“Shu formani tiktirib kiyasizlar” - UrDUda talabalarga bir yilda ikki marta forma talabi qo‘yilmoqda

Urganch davlat universitetida talabalardan bir yil ichida ikki marta forma talab qilinmoqda, bu esa noroziliklarga sabab bo‘lmoqda.

Kun.uz'ga yetib kelgan audioyozuvda universitet mas’ullaridan biri talabalarga yangi forma kiyish bo‘yicha ko‘rsatma bergan. Unga ko‘ra, o‘g‘il bolalar to‘q ko‘k rangli kostyum-shim, qizlar esa yubka-koftaning ikki variantidan birini tanlab tikdirishlari shart. Audioyozuvda: "Bugundan harakatni qiling, shu formani tiktirib kiyasizlar", – deyilgan.

Shuningdek, universitet guruhlarida o‘qituvchi-tyutorlarga talabalarning kiyim o‘lchamlarini yig‘ish bo‘yicha topshiriq berilgani ma’lum qilingan.

Manbaning xabar berishicha, joriy yilning aprel-may oylarida ham UrDU talabalari uchun adras matoli yangi forma joriy qilingan edi. Oradan bir necha oy o‘tib, yangi o‘quv yili arafasida yana boshqa – ko‘k va oq rangli forma xarid qilish talabi qo‘yilmoqda.

O‘zbekiston oliy ta’lim tizimida talabalar formasi masalasi uzoq yillardan beri bahs-munozaralarga sabab bo‘lib keladi. Ikki yil avval Toshkent davlat pedagogika universitetida dekan o‘rinbosari talabalarga ma’lum bir dizayndagi formani sotib olish va kiyish bo‘yicha bosim o‘tkazgan edi. O‘tgan o‘quv yilida esa Jurnalistika va ommaviy kommunikatsiyalar universitetida bir guruh talabalar formasi yo‘qligi sababli darsga kiritilmagani aytilgan, ammo ma’muriyat ularning darsga kechikib kelgani sababli oliygohga qo‘yilmaganini bildirgan.

Oliy ta’lim vazirligi bu boradagi muhokamalarda so‘nggi yillarda doimiy ravishda bir fikrni ta’kidlab keladi: talabalarning kiyinishi yuzasidan har bir OTM o‘z ichki tartib-qoidalaridan kelib chiqib talab belgilashga haqli. Shu bilan birga, vazirlik talabalar formasi bo‘yicha OTMlarga talab qo‘yilmasligini aytib keladi.

Biroq, bu yerda boshqa savol paydo bo‘ladi: ichki tartibda kiyinish talabini belgilash bilan talabalarga muayyan modeldagi yangi kiyimni (ba’zan qisqa muddatlarda qayta-qayta) tikdirish majburiyatidan qanday manfaat bor? Qolaversa, bunday forma kim tomonidan tanlangani, uning narxi qancha ekani, talabalarga muqobil variantlar berilgan-berilmagani va avvalgi formani olgan talabalarning yangi formaga yana xarajat qilish zarurati qanday asoslangani ham ochiq qolmoqda.

Ta’lim maskanimi yoki diplom fabrikasi: oliy ta’limda bugun standartlar qanday?