Shri Lankada 2019-yilgi teraktlar bo‘yicha 15 kishi 260 yilgacha qamoqqa hukm qilindi
Shri Lankada 2019-yilgi teraktlar bo‘yicha 15 kishi 260 yilgacha qamoqqa hukm qilindi
Shri Lanka Oliy sudi 2019-yilgi Pasxa bayramida sodir etilgan qonli teraktlar yuzasidan 15 nafar erkakni aybdor deb topib, ularning har biriga 200 yildan 260 yilgacha ozodlikdan mahrum etish jazosi tayinladi. Bu haqda Deutsche Welle xabar berdi.
Uch sudyadan iborat hay’at 22-sentyabr kuni 14 nafar sudlanuvchini qotillik, terrorizm fitnasi va noqonuniy qurol-yarog‘ saqlash kabi barcha ayblovlar bo‘yicha aybdor deb topdi. 15-sudlanuvchi esa ayblovlarning bir qismi bo‘yicha aybdor deb topildi.
Sud, shuningdek, mahkumlarning mol-mulki va aktivlarini musodara qilishga qaror qildi. Ish bo‘yicha yana 9 kishi oqlangan bo‘lib, aybdor deb topilganlar Oliy sudga appelyatsiya berish huquqiga ega.
Terror va besh yillik sud jarayoni
2019-yil 21-aprel kuni uchta cherkov va uchta hashamatli mehmonxonada ketma-ket xudkushlik portlashlari sodir bo‘lgan edi. Natijada 279 kishi halok bo‘lib, 574 kishi jarohatlangan. Bu hodisa mamlakat tarixidagi eng qonli voqealardan biriga aylangan.
Qariyb besh yil davom etgan sud jarayonida rasmiylar 25 nafar gumondorga nisbatan 23 270 ta ayblov qo‘ygan. Sudlanuvchilardan biri tergov hibsxonasida vafot etgan, sud jarayoniga esa 2300 dan ortiq guvoh jalb qilingan.
Hukm qilinganlar orasida portlashlarning asosiy tashkilotchisi deb hisoblangan Muhammad Ibrohim Muhammad Naufer ham bor. U boshqa ishtirokchilarni o‘z ta’limoti bilan radikallashtirganlikda ayblanib, 240 yillik og‘ir mehnatga hukm qilindi.
Ushbu hukm portlashlarga davlat tuzilmalari aloqador bo‘lishi mumkinligi haqidagi gumonlar yuzasidan alohida tergov davom etayotgan paytda e’lon qilindi. Chunki avvalroq mamlakat razvedkasining sobiq rahbari Suresh Solli teraktni tashkillashtirishda ishtirok etganlikda ayblanib ushlangan edi.