Shotlandiyada suv ostidan ichida besh tonna oltin va kumush bo‘lgan kema topildi
Shotlandiyada suv ostidan besh tonna oltin va kumushni o‘z ichiga olgan kema topildi.
Shotlandiyalik olimlar qariyb 400 yil avval qirollik xazinasini tashiyotganida cho‘kib ketgan kemani aniqladilar. The Daily Star xabariga ko‘ra, 1633-yilda qirol Charlz I ning ko‘z o‘ngida cho‘kkan ushbu kemada taxminan besh tonna oltin va kumush, shuningdek, qimmatbaho san’at asarlari bo‘lgan.
Nashr ma’lumotlariga ko‘ra, kema Angliya va Shotlandiya qiroli Charlz I ga tegishli bo‘lgan. 1633-yilda monarx Shotlandiya hukmdori sifatida taxtga o‘tirishga tayyorgarlik ko‘rayotganida, kema Fert-of-Fort ko‘rfazida ag‘darilib, cho‘kib ketgan. Bu voqea boshqa kemada suzib ketayotgan Karl I ning ko‘z o‘ngida sodir bo‘lgan.
"Blessing of Burntisland" kemasi bortida monarxning turli shaxsiy buyumlari, san’at asarlari va 280 kishiga mo‘ljallangan ulkan serviz ko‘rinishidagi taxminan besh tonna oltin va kumush bo‘lgan.
Burntisland Heritage Trust tashkiloti kemani 30 yildan ortiq vaqt davomida qidirgan. Avgust oyi oxirida tashkilot qidiruvda katta yutuq bo‘lganini e’lon qildi. Kema qoldiqlari Shotlandiyaning Berntaylend shaharchasi qirg‘og‘idan bir yarim kilometr uzoqlikda topildi. Kema qoldiqlari skaner yordamida loy qatlami ostidan aniqlandi.
Tadqiqotchilar, shuningdek, qirollik kemasining bir qismi bo‘lishi mumkin bo‘lgan yog‘och bo‘lagini suvdan olib chiqishga muvaffaq bo‘ldilar. Burntisland Heritage Trust vakillari bu boshqa kema bo‘lib chiqishi mumkinligini ham istisno etmayaptilar.
Hozirgi hisob-kitoblarga ko‘ra, "Blessing of Burntisland" yukining qiymati taxminan 30 million funt sterling (40 762 950 dollar)ni tashkil etishi mumkin. Lekin bu faqat oltin va kumushning vazniga tegishli. Agar kema bortidagi Karl I ning shaxsiy buyumlari yaxshi saqlangan bo‘lsa, parom yukining umumiy qiymati 1 milliard funt sterling (1 358 715 000 dollar)ga yetishi mumkin.