Shifoxonalarga 2026-yilda 900 dan ortiq hujum uyushtirildi — JSST
**JSST: 2026-yilda shifoxonalarga 900 dan ortiq hujum uyushtirildi, 911 kishi halok bo‘ldi**
Jahon sog‘liqni saqlash tashkiloti (JSST) ma’lumotlariga ko‘ra, 2026-yilda tibbiyot muassasalari va xodimlariga nisbatan 914 ta hujum sodir etilgan. Birlashgan Millatlar Tashkiloti tomonidan e’lon qilingan ushbu ma’lumotlarga ko‘ra, ushbu hujumlar natijasida kamida 911 kishi hayotdan ko‘z yumgan va 1486 kishi jarohatlangan. Bu har kuni o‘rtacha to‘rttadan ortiq hujum sodir bo‘lganini anglatadi.
Shuningdek, ushbu davrda tibbiyot xodimlarini va bemorlarni o‘g‘irlash, hibsga olish hamda ushlab turish bilan bog‘liq 44 ta holat qayd etilgan. Bu holatlarning aksariyati tibbiyot xodimlarini ushlab turish bilan bog‘liq bo‘lib, undan 94 kishi jabrlangan.
JSSTning gumanitar yordam va tabiiy ofatlarni boshqarish bo‘yicha direktori Altaf Musaniyning ta’kidlashicha, 2018-yildan buyon tibbiyot muassasalariga qarshi 10 400 dan ortiq hujum hujjatlashtirilgan. Bu hujumlar natijasida taxminan 5700 kishi halok bo‘lgan va yana 8500 kishi tan jarohati olgan.
2026-yilda tibbiyot sohasiga qilingan hujumlardan eng ko‘p Ukraina, Livan va bosib olingan Falastin hududlari jabr ko‘rgan. Shuningdek, Myanma, Eron, Sudan, Kongo Demokratik Respublikasi, Janubiy Sudan, Rossiya Federatsiyasi, Suriya va Nigeriyada ham tibbiyot muassasalariga hujumlar qayd etilgan. JSST Yaqin Sharqdagi urush davomida, jumladan Livan, Isroil va Eronda tibbiyot obyektlariga qilingan hujumlarni ro‘yxatga olishda davom etmoqda.
2026-yilda eng ko‘p uchragan hujum turi og‘ir qurollardan berilgan zarbalar bo‘lgan. JSST kasalxonaga hujum qilinganda faqatgina ichkaridagi odamlar jabr ko‘rmasligini ta’kidladi. Bu shuni anglatadiki, hujumdan keyingi kunlarda bemorlar zarur xizmatlarni ololmaydi, tibbiyot xodimlari ishidan ayriladi va hayotiy muhim dori-darmonlar ta’minoti uziladi.
Aybdorlarni javobgarlikka tortish masalasida Musaniy tashkilotda buning uchun vakolat ham, zarur huquqlar ham yo‘qligini ta’kidladi. Uning so‘zlariga ko‘ra, "afsuski, tasdiqlangan 10 mingdan ortiq hujumdan birortasi ham hali javobgarlikka tortilmagan".
Avvalroq JSST so‘nggi to‘rt yilda Yevropada issiqdan 200 ming odam vafot etgani haqida ma’lumot bergandi. Tashkilotning Yevropa mintaqaviy byurosi direktori Hans Klyugening so‘zlariga ko‘ra, oxirgi 20 yilda issiqlik bilan bog‘liq o‘lim holatlari 30 foizga oshgan.