Shifokorlar adashdi: Britaniyada 7 yoshli bolada insult yuz berganini ChatGPT aniqlay oldi
Shifokorlar xato qilgan: Britaniyada 7 yoshli bolada insultni ChatGPT aniqlagan
Buyuk Britaniyada 7 yoshli bolada insult yuz berganini ChatGPT aniqlay olgan.
Hodisa 2026-yil may oyida sodir bo‘lgan. Britaniyalik ayolning 7 yoshli o‘g‘li suzish paytida tanasining chap tomonida uvishish, “chumoli yurgandek” hissi va holsizlik borligini aytgan.
Shundan keyin ona ChatGPT’dan bu belgilar nimadan kelib chiqishi mumkinligini so‘ragan. Sun’iy intellekt insult ehtimolini ko‘rsatib, bolani shifokorga olib borishni tavsiya qilgan.
Ona bolani shifoxonaga olib borgan. Ammo ko‘rikdan so‘ng shifokorlar uni uyiga qaytargan.
Keyingi haftalarda bolaning ahvoli og‘irlashgan. 25-iyun kuni u ko‘ngli aynib uyg‘ongan, alahsiray boshlagan, atrofdagilarga javob bermagan va deyarli harakatlana olmagan.
“Bolam uyg‘onib, o‘zini yomon his qilayotganini aytdi, keyin bir necha marta qayt qildi. U juda gangib qolgan edi: kulardi, yura olmasdi, gavdasini tutib turolmasdi, ko‘zlari yumilgan edi. U gaplarimga umuman javob bermasdi”, deydi bolaning onasi.
Uning aytishicha, bola tinmay so‘lak oqizgan. Dastlab ona o‘g‘lining ahvoli yomonlashishini Buyuk Britaniyada kuzatilgan kuchli issiq bilan bog‘lagan. O‘sha kuni havo harorati 38 darajagacha ko‘tarilgan.
“Harorat 38 daraja bo‘lgan kuni hammasi issiq tufayli bo‘lishi mumkin, deb o‘ylagandim”, dedi u.
Biroq bolaning shifoxonadagi holati juda og‘irlashgan. Onasining so‘zlariga ko‘ra, unda tirishishga o‘xshash belgilar kuzatilgan va bola og‘riqdan qichqirgan. Shundan keyingina yaqinlarining qat’iy talabi bilan unga to‘liq tibbiy tekshiruv o‘tkazilgan.
Tekshiruv natijasida miya arteriyalaridan biri to‘silib qolgani va bu ishemik insultga sabab bo‘lgani aniqlangan.
Bola zudlik bilan ixtisoslashtirilgan klinikaga olib ketilgan va uch hafta davomida sun’iy koma holatida saqlangan. Shifokorlar uning sog‘ayish ehtimolini juda past baholagan. Eng yaxshi holatda bola o‘ng qo‘li bilan tugma taqa olish darajasida tiklanishi mumkinligi aytilgan.
Shunga qaramay, 11-avgust kuni bola shifoxonadan chiqarilgan. Hozir u yurish va gapirishni qayta o‘rganmoqda. Biroq miyaga yetgan zarar uning rivojlanishida jiddiy ortga ketishga olib kelgan. Ayni paytda onasi uning reabilitatsiyasi bilan shug‘ullanmoqda.
Shifoxonalar birlashmasi vakili oiladan rasman uzr so‘ragan va shifokorlar insultni dastlabki bosqichda nima sababdan aniqlay olmaganini o‘rganish uchun ichki tekshiruv boshlanganini bildirgan.
Anxoy provinsiyasida yashovchi 67 yoshli fermer taxminan bir yildan beri sun’iy intellekt (SI) dan foydalanib keladi. U ekin ekish va o‘g‘itlash muddatlaridan tortib pestitsidlardan foydalanishgacha bo‘lgan masalalarda SIdan maslahat olgan.