Shaxmat. Bibisora Assaubayeva nufuzli turnirda ikkinchi medalini qo‘lga kiritib yakuniy bosqichga yo‘l oldi
Shaxmat bo‘yicha Qozog‘istonlik grossmeyster Bibisora Assaubayeva Fransiyaning Sen-Trope shahrida bo‘lib o‘tgan WR Women’s Chess Tour turnirining blits bahslarida ikkinchi o‘rinni egallab, Grand finalga yo‘llanma oldi. Bu uning ushbu nufuzli turnirdagi ikkinchi medali bo‘ldi.
Yarim finalda Assaubayeva germaniyalik Elizabet Pets bilan kuch sinashdi. Dastlab 0,5:1,5 hisobida ortda qolgan bo‘lsa-da, keyingi partiyada hisobni tenglashtira oldi. G‘olib tay-breykda, aniqrog‘i, armageddon partiyasida aniqlandi, unda Assaubayeva raqibini mag‘lub etib, finalga chiqdi.
Finalda uning raqibi ukrainalik Anna Muzichuk bo‘ldi. Assaubayeva birinchi partiyada g‘alaba qozondi, ammo Muzichuk keyingi partiyada hisobni tenglashtirdi. Uchinchi partiya durang bilan yakunlandi, chempionlik taqdiri esa to‘rtinchi partiyada hal bo‘ldi.
Hal qiluvchi partiyada qora donalarda o‘ynagan Assaubayeva mag‘lubiyatga uchradi. Natijada, Muzichuk 2,5:1,5 hisobida g‘alaba qozonib, bosh sovrin va 7 000 dollar mukofot puliga ega chiqdi. Bibisora Assaubayeva 7,5 ochko bilan kumush medalni qo‘lga kiritdi. Uchinchi o‘rin Elizabet Petsga nasib etdi.
Eslatib o‘tamiz, 25-avgust kuni Sen-Tropeda o‘tkazilgan rapid turnirida Assaubayeva ukrainalik Mariya Muzichukni 2:0 hisobida mag‘lub etib, oltin medalni qo‘lga kiritgan edi.
Shu tariqa, qozog‘istonlik shaxmatchi WR Women’s Chess Tour musobaqasining Fransiyadagi bosqichini oltin va kumush medal bilan yakunladi.
Bu natija Bibisora Assaubayevaga Yevropa bosqichining Grand finalida ishtirok etish huquqini berdi. Hal qiluvchi turnir 22–23-noyabr kunlari Germaniyaning Shtutgart shahrida bo‘lib o‘tadi.
Ma’lumot uchun, WR Women’s Chess Tour — ayollar shaxmatini rivojlantirish va ommalashtirishga qaratilgan yangi xalqaro loyiha bo‘lib, uning umumiy mukofot jamg‘armasi 200 ming AQSH dollarini tashkil etadi. Yil davomida turnir bosqichlari Tokio, Punta-Kana, Maputu va Sen-Trope shaharlarida o‘tkaziladi. Har bir bosqichga dunyoning yetakchi 8 nafar shaxmatchisi taklif etiladi, yakunda eng yuqori natija ko‘rsatgan ikki sportchi noyabr oyida Shtutgartda bo‘lib o‘tadigan yakuniy bosqichga yo‘llanma oladi.