Shavkat Mirziyoyev yangi temiryo‘l orqali Urganchdan Xivaga bordi

Shavkat Mirziyoyev yangi temiryo‘l liniyasi orqali Urganchdan Xivaga yetib keldi.

17-avgust kuni Shavkat Mirziyoyev Urganch xalqaro aeroporti va Xiva temiryo‘l bekatini bog‘lovchi yangi temiryo‘l liniyasi bilan tanishdi va ushbu yo‘nalishga qo‘yilgan yangi elektropoyezdda Xivaga keldi.

Prezident matbuot xizmatining ma’lumotiga ko‘ra, 225 milliard so‘m qiymatidagi loyiha doirasida Urganch xalqaro aeroporti va temiryo‘l vokzalini bog‘lovchi 11 kilometrlik yangi temiryo‘l liniyasi qurildi. Bu yo‘nalishda bitta bekat, ko‘prik, avtomobil yo‘llari bilan kesishmalar va 25 ta suv o‘tkazish inshooti barpo etildi.

Yangi yo‘nalish orqali yiliga qariyb 650 ming nafar mahalliy va xorijlik sayyohni tashish imkoniyati yaratildi. Xiva va Urganch o‘rtasidagi qatnov vaqti ikki barobar qisqarib, 80 daqiqadan 40 daqiqaga tushadi. 30 ga yaqin yangi ish o‘rni tashkil etildi. Aeroport va temir yo‘lni bevosita bog‘laydigan bunday loyiha mamlakatda birinchi marta amalga oshirildi. Urganch xalqaro aeroporti – Xiva yo‘nalishida Xitoyda ishlab chiqarilgan CR200J elektropoyezdi qatnovi yo‘lga qo‘yilmoqda.

Olti vagondan iborat mazkur elektropoyezd bir vaqtning o‘zida qariyb 400 nafar yo‘lovchini tashish imkoniyatiga ega. U soatiga 160 kilometrgacha tezlikda harakatlanadi. Vagonlarda VIP, biznes va ekonom-klass o‘rinlari, bepul Wi-Fi, elektron qurilmalarni quvvatlash imkoniyati, zamonaviy konditsioner va isitish tizimlari mavjud. Nogironligi bo‘lgan shaxslar uchun ham zarur sharoitlar yaratilgan.

Davlat rahbari yangi elektropoyezdda Xiva shahriga keldi. Xivada prezident Urganch xalqaro aeroporti va Xiva temiryo‘l vokzalini bog‘laydigan yo‘nalishda qatnovga qo‘yiladigan yangi trolleybuslarni ham ko‘zdan kechirdi.

Qayd etilishicha, 2026-yil iyul oyida Xitoydan olib kelingan 10 ta trolleybus zamonaviy avtonom harakatlanish tizimi bilan jihozlangan bo‘lib, elektr tarmog‘iga ulanmagan holda ham 100 kilometrgacha yo‘l bosishi mumkin. Har bir trolleybus 87 nafar yo‘lovchiga mo‘ljallangan. Ularda nogironligi bo‘lgan shaxslar, keksalar va bolali yo‘lovchilar uchun qulayliklar, USB va Type-C portlari, ichki va tashqi kuzatuv kameralari o‘rnatilgan. Shuningdek, haydovchi holatini kuzatish, harakat yo‘lagidan chiqib ketishdan ogohlantirish va avtomatik yong‘in o‘chirish kabi xavfsizlik tizimlari mavjud.

Ushbu zamonaviy transport vositalarini olib kelish tashabbusi prezidentning o‘tgan yilgi Xorazm viloyatiga tashrifi davomida ilgari surilgan edi.

Davlat rahbari transport turlarini o‘zaro uyg‘unlashtirish aholi va sayyohlar uchun qulaylik yaratish, yo‘lga ketadigan vaqtni qisqartirish hamda hududning turistik jozibadorligini oshirishga xizmat qilishini ta’kidladi. Mutasaddilarga yo‘lovchilar uchun xavfsiz va sifatli xizmat ko‘rsatishni ta’minlash bo‘yicha tegishli ko‘rsatmalar berildi.