Shavkat Mirziyoyev Xitoy va Nepal rahbarlariga hamdardlik bildirdi
Ushbu hodisa sabab Xitoy va Nepalda 160 dan oshiq kishi halok bo‘ldi.
Shavkat Mirziyoyev Xitoy va Nepal rahbarlariga hamdardlik bildirdi.
O‘zbekiston Respublikasi Prezidenti Shavkat Mirziyoyev Xitoy Xalq Respublikasi Raisi Si Szinpingga Tibet avtonom rayonining Shigadze shahar okrugida ro‘y bergan keng ko‘lamli ko‘chki va suv toshqinlari tufayli ko‘plab insonlarning hayotdan ko‘z yumgani, jarohatlangani hamda ulkan iqtisodiy zarar yetkazilgani munosabati bilan chuqur hamdardlik izhor etdi.
Davlatimiz rahbari halok bo‘lganlarning oila a’zolari va yaqinlariga sabr-toqat tilab, jarohat olganlarning tez fursatda sog‘ayib ketishini niyat qildi.
Shuningdek, Shavkat Mirziyoyev Nepal Prezidenti Ram Chandra Paudelga ham Tibet bilan chegaradosh hududlarda yuz bergan kuchli suv toshqinlari oqibatida ko‘plab insonlarning qurbon bo‘lgani, jarohatlangani va katta miqdordagi talafotlar ko‘rilgani munosabati bilan hamdardlik yo‘lladi.
Ma’lumot o‘rnida, Nepal va Xitoyda sodir bo‘lgan ushbu toshqinlarda 160 nafardan ziyod kishi halok bo‘lgan, yuzlab insonlar esa bedarak yo‘qolgan.