Shavkat Mirziyoyev pedofillar uchun jazoni kuchaytirish toʻgʻrisidagi qonunni imzoladi
Shavkat Mirziyoyev pedofillar uchun jazoni ogʻirlashtiruvchi qonunni imzoladi
Oʻzbekistonda 14 yoshga toʻlmagan bolalarga nisbatan jinsiy zoʻravonlik uchun javobgarlik kuchaytirildi — endi bunday jinoyatlar uchun 25 yilgacha ozodlikdan mahrum qilish yoki umrbod ozodlikdan mahrum qilish jazosi nazarda tutilgan. Tegishli qonunni prezident Shavkat Mirziyoyev imzoladi.
Bu haqda Prezident Administratsiyasi rahbari Saida Mirziyoyeva maʼlum qildi.
Hujjat beshta kodeks va oltata qonunga oʻzgartirishlar kiritadi.
Yangi normalarga koʻra, bunday jinoyatlar boʻyicha javobgarlikka tortish muddati oʻtib ketmaydi. Bundan tashqari, bolaning oʻlimiga sabab boʻlgan qasddan qilingan jinoyatlarni sodir etgan shaxslar uchun shartli hukm qilish va jazodan muddatidan ilgari shartli ozod qilish imkoniyati chiqarib tashlanadi.
Qonun, shuningdek, zoʻravonlikdan jabr koʻrgan bolalar uchun qoʻshimcha kafolatlarni joriy etadi. Takroriy ruhiy jarohat olish xavfini kamaytirish uchun ularni soʻroq qilish videoga olinadi. Bolaning ayblanuvchi bilan yuzlashtirilishi faqat vakolatli mansabdor shaxslar yoki sud qaroriga koʻra oʻtkaziladi.
Jinoyat protsessining dastlabki bosqichlaridan boshlab jabrlangan bola davlat hisobidan bepul advokat bilan taʼminlanadi.
Alohida oʻzgartirishlar taʼlim va tarbiya muassasalari xodimlariga tegishli. Agar ular bolaga nisbatan zoʻravonlik sodir etsa, bunday xodim bilan mehnat shartnomasini bekor qilish uchun huquqiy asoslar paydo boʻladi.
Shuningdek, bolalarni parvarishlash boʻyicha majburiyatlarni bajarmaslik, jinsiy shilqimlik qilish, nikoh yoshini buzish va bolalarni sogʻligʻiga zarar yetkazuvchi axborotdan himoya qilish boʻyicha majburiyatlarni tegishlicha bajarmaganlik uchun maʼmuriy javobgarlik ogʻirlashtirilmoqda.
Toshkentning Olmazor tumanida huquq-tirtibot idoralari erkak kishi bilan diniy nikohda yashagan oʻsmir qizga nisbatan zoʻravonlik haqidagi xabarni tekshirmoqda. Dastlabki maʼlumotlarga koʻra, u qizga nisbatan jismoniy kuch ishlatgan va jinsiy xarakterdagi harakatlarni sodir etib, unga jarohatlar yetkazgan.