Shavkat Mirziyoyev Markaziy Osiyoda talab yuqori bo‘lgan kasblar atlasini yaratishni taklif qildi
O‘zbekiston prezidenti Markaziy Osiyo davlatlariga mutaxassislar tayyorlashni iqtisodiyot ehtiyojlari bilan bog‘laydigan talab yuqori bo‘lgan kasb va kompetensiyalarning mintaqaviy atlasini yaratishni taklif qildi. Uning so‘zlariga ko‘ra, kelgusida kadrlarni muayyan yirik loyihalar uchun tayyorlash mumkin.
Shavkat Mirziyoyev Markaziy Osiyoda talab yuqori bo‘lgan kasblar atlasini yaratishni taklif qildi
O‘zbekiston prezidenti Shavkat Mirziyoyev Markaziy Osiyo davlatlariga talab yuqori bo‘lgan kasb va kompetensiyalarning mintaqaviy atlasini ishlab chiqishni taklif etdi. Bu haqda u Turkmanistonning Avaza shahrida o‘tkazilgan Markaziy Osiyo davlatlari va Ozarbayjon rahbarlarining sakkizinchi Maslahat uchrashuvida ma’lum qildi.
“Kelgusida iqtisodiyotimizga qanday mutaxassislar kerak bo‘lishini yaxshi tushunishimiz lozim. Buning uchun talab yuqori bo‘lgan kasblar va kompetensiyalarning mintaqaviy atlasini ishlab chiqishni taklif qilamiz. Unda bugungi kunda mutaxassislar tanqisligi sezilayotgan va yaqin yillarda talab o‘sib boradigan yo‘nalishlar bo‘yicha mamlakatlarimizning prognoz ma’lumotlarini birlashtirish mumkin. Bu universitetlar va kasb-hunar ta’limi muassasalariga iqtisodiyotning real ehtiyojlarini oldindan hisobga olish imkonini beradi”, — dedi davlat rahbari.
Prezident kelgusida mintaqaning bir nechta mamlakatida amalga oshiriladigan yirik loyihalar uchun kadrlar tayyorlash mumkinligini ta’kidladi.
“Shu tariqa ta’lim sanoat, transport, energetika, raqamli texnologiyalar va boshqa sohalar rivoji bilan bevosita bog‘lanadi”, — dedi Shavkat Mirziyoyev.
“Mamlakatlarimiz katta demografik salohiyatga ega. Aholi soni ortib, yoshlar ko‘paymoqda. Mintaqa iqtisodiyotining o‘n, yigirma va o‘ttiz yildan keyin qanday bo‘lishi ko‘p jihatdan yoshlarning ta’limi va kasbiy tayyorgarligi sifatiga bog‘liq. Shuning uchun hamkorligimizda ta’lim va yoshlarni qo‘llab-quvvatlash alohida o‘rin tutishi kerak”, — dedi prezident.