Shavkat Mirziyoyev ichki ishlar organlari xodimlari va faxriylarini tabrikladi
Davlat rahbari xalq osoyishtaligini ta’minlash, fuqarolarning huquq va manfaatlarini himoya qilish yo‘lidagi fidokorona xizmatlari uchun
Shavkat Mirziyoyev ichki ishlar organlari xodimlari va faxriylarini tabrikladi
Prezident Shavkat Mirziyoyev O‘zbekiston Respublikasi Ichki ishlar vazirligi tashkil etilganining 35 yilligi munosabati bilan ichki ishlar organlari xodimlari va faxriylariga tabrik yo‘lladi.
Davlat rahbari xalq osoyishtaligini ta’minlash, fuqarolarning huquq va manfaatlarini himoya qilish yo‘lidagi fidokorona xizmatlari uchun soha vakillariga minnatdorlik bildirdi.
«Oddiy insonlarning sizga ishonch bilan murojaat qilishi va bundan ko‘ngli taskin topishi – sizning xizmatingizga berilgan eng yuksak bahodir», - deyiladi tabrikda.
Prezident joriy yilda mamlakat mahallalarining qariyb yarmida jinoyat sodir etilmaganini ta’kidladi. Bu ichki ishlar xodimlari, mahalla faollari va aholining hamkorlikdagi mehnati natijasi ekani qayd etildi.
Shuningdek, jamoat xavfsizligini ta’minlashda sun’iy intellekt va raqamli texnologiyalardan foydalanish, kiberjinoyatchilik, giyohvandlik hamda uyushgan jinoyatchilikka qarshi kurashish vazifalariga e’tibor qaratildi.
Davlat rahbari ichki ishlar xodimlarini qonunga qat’iy rioya qilish, fuqarolarga hurmat bilan munosabatda bo‘lish va xalq ishonchini mustahkamlashga chaqirdi.
Tabrikda soha faxriylarining xizmatlari ham alohida e’tirof etildi.