Shavkat Mirziyoyev Armaniston bosh vaziri Nikol Pashinyan bilan uchrashdi
Oʻzbekiston – Armaniston koʻp qirrali munosabatlarini yanada kengaytirishning dolzarb masalalari koʻrib chiqildi.
Shavkat Mirziyoyev Armaniston bosh vaziri Nikol Pashinyan bilan uchrashdi
8-oktabr kuni Turkmanistonning Avaza shahrida o‘tayotgan tadbirlar doirasida prezident Shavkat Mirziyoyev Armaniston bosh vaziri Nikol Pashinyan bilan uchrashuv o‘tkazdi.
Uchrashuvda O‘zbekiston – Armaniston ko‘p qirrali munosabatlarini yanada kengaytirishning dolzarb jihatlari ko‘rib chiqildi.
Turli darajalarda faol aloqalar yo‘lga qo‘yilgani mamnuniyat bilan qayd etildi. Yaqinda ikki mamlakat o‘rtasida siyosiy maslahatlashuvlar bo‘lib o‘tgani ta’kidlandi.
O‘zaro savdo hajmi ortib borayotgani, mamlakatimizda Armaniston sarmoyasi ishtirokidagi 80 ta korxona muvaffaqiyatli faoliyat yuritayotgani aytildi. Poytaxtlar o‘rtasida to‘g‘ridan-to‘g‘ri aviaqatnov yo‘lga qo‘yilgan.
Qishloq xo‘jaligi, zargarlik, yengil sanoat, farmatsevtika, kimyo va turizm yo‘nalishlarida kooperatsiya loyihalarini ilgari surish muhimligi ta’kidlandi.
Shu munosabat bilan Hukumatlararo komissiyaning navbatdagi yig‘ilishi hamda qo‘shma ishbilarmonlik tadbirlarini samarali tashkil etish zarurligi qayd etildi.
Tomonlar xalqaro ahamiyatga molik masalalar va ko‘p tomonlama tashkilotlar doirasidagi hamkorlikni ham muhokama qildilar.