Shavkat Mirziyoyev AQSH prezidentining maxsus vakili Serjio Gor bilan uchrashdi
Oʻzbekiston va AQSH oʻrtasidagi strategik sheriklikni rivojlantirishga qaratilgan bir qator muhim tadbirlarga tayyorgarlik koʻrilmoqda. Shavkat Mirziyoyev AQSH prezidentining maxsus vakili Serjio Gor bilan uchrashuvda Marko Rubioning boʻlajak tashrifi, «S5+1» vazirlar uchrashuvi va ikki mamlakat ishbilarmonlik kengashining yigʻilishini muhokama qildi.
Shavkat Mirziyoyev AQSH prezidentining maxsus vakili Serjio Gor bilan uchrashdi
Prezident Shavkat Mirziyoyev 16-oktabr kuni AQSH prezidentining Janubiy va Markaziy Osiyo boʻyicha maxsus vakili Serjio Gorni qabul qildi.
Uchrashuvda Oʻzbekiston – AQSH strategik sheriklik munosabatlarini yanada rivojlantirishning dolzarb masalalari muhokama qilindi.
AQSH Davlat kotibi Marko Rubioning Oʻzbekistonga boʻlajak tashrifi, “S5+1” formatidagi vazirlar uchrashuvi hamda Oʻzbekiston – Amerika ishbilarmonlik va investitsiya kengashining ikkinchi yigʻilishiga tayyorgarlik masalalariga alohida eʼtibor qaratildi.
Boʻlajak tadbirlarni mazmunan boyitish, yangi tashabbuslarni ishlab chiqish va ustuvor yoʻnalishlarda qoʻshma loyihalarni amalga oshirish zarurligi taʼkidlandi.
Qisqa muddatda savdo-iqtisodiy aloqalarni rivojlantirish, investitsiyalarni jalb etish va qoʻshma ishbilarmonlik tashabbuslarini ilgari surishning samarali mexanizmiga aylangan ishbilarmonlik kengashining ahamiyati ortib borayotgani alohida qayd etildi.
Shuningdek, ikki mamlakat yetakchilari ishtirokida oʻtkaziladigan boʻlajak xalqaro tadbirlar rejasi yuzasidan ham fikr almashildi.