“Sharmandali mahalla” tashabbuskori va Toshkentdagi eng baland binoga chiqish rekordi - mahalliy dayjest

**"Sharmandali mahalla" tashabbusi va Toshkentdagi eng baland binoga chiqish rekordi – mahalliy dayjest**

Bugungi dayjestimizda "Sharmandali mahalla" va "Uyatli xonadon" tashabbusining hokimga tegishli ekani, Toshkentdagi eng baland binoga piyoda 9 daqiqada chiqilgani, davlat tashkilotlarida o‘zbek tiliga rioya etish nazoratining kuchaytirilishi hamda Qashqadaryoda Amir Temur muzey-yodgorlik majmuasi qurilishi haqidagi muhim yangiliklar bilan tanishtiramiz.

**"Sharmandali mahalla" va "Uyatli xonadon" tashabbusi hokimniki ekani ma’lum bo‘ldi**

Toshkent viloyati Chinoz tumanida obodonlashtirilmagan mahallalarga "Sharmandali mahalla", yaxshi qaralmagan uylarga esa "Uyatli xonadon" bannerlari osilishi tashabbusi tuman hokimi Sherzod Solihovga tegishli ekani aniqlandi.

Hokimning so‘zlariga ko‘ra, bu borada unga hech kim topshiriq bermagan, bu amaliyot hech qaysi mahallada joriy etilmagan, faqat ijtimoiy tarmoqqa chiqarish uchun videoga olingan.

Solihov o‘z tashabbusidan maqsad "xalqni uyg‘otib, obodonlashtirishga chorlash" bo‘lganini ta’kidlab, hamma xato qilishini aytgan va aybi bo‘lsa, uzr so‘rashini bildirgan.

**Toshkentdagi eng baland binoga piyoda 9 daqiqada chiqildi**

Poytaxt Favqulodda vaziyatlar bosh boshqarmasi tomonidan o‘tkazilgan maxsus eksperimentda qutqaruvchi Nest One binosining zinalaridan piyoda eng yuqori qavatga ko‘tarilish vaqtini namoyish etdi.

Ma’lum bo‘lishicha, qutqaruvchi 51-qavatga chiqish uchun 9 daqiqa-yu 3 soniya vaqt sarflagan. Favqulodda vaziyatlar bosh boshqarmasi bu natijani mazkur binoga piyoda ko‘tarilishda rekord deb e’lon qilib, sportchi va blogerlarga chaqiruv tashladi.

**Davlat tashkilotlarida o‘zbek tiliga rioya etish nazorati kuchaytiriladi**

O‘zbekistonda davlat organlari va tashkilotlarida davlat tilida ish yuritishni samarali tashkil etish hamda o‘zbek tili qoidalariga rioya etilishini ta’minlash bo‘yicha qo‘shimcha choralar belgilandi.

Davlat tili masalalari bo‘yicha maslahatchilar qonunchilik ijrosini nazorat qilib, hujjatlar, tashqi yozuvlar va reklamalarning til me’yorlariga muvofiqligini o‘rganib boradi.

Maslahatchilar faoliyatini endi Vazirlar Mahkamasining Davlat tilini rivojlantirish departamenti muvofiqlashtiradi va uslubiy jihatdan boshqaradi. Maslahatchilar tegishli tashkilot rahbari tomonidan Departament bilan kelishilgan holda lavozimga tayinlanadi va ozod etiladi.

Maslahatchilarning asosiy vazifalaridan biri davlat tili, geografik ob’yektlar va ma’naviy-ma’rifiy sohaga oid qonunchilik talablariga rioya etilishini ta’minlash bo‘ladi. Shuningdek, normativ-huquqiy hujjatlar loyihalarini lingvistik ekspertizadan o‘tkazish choralari ko‘riladi.

**Qashqadaryoda Amir Temur muzey-yodgorlik majmuasi quriladi**

Markaziy Osiyo tarixidagi buyuk davlat arbobi Amir Temur sharafiga u tug‘ilgan Qashqadaryo viloyati Yakkabog‘ tumanida muzey-yodgorlik majmuasi barpo etiladi.

Tuman hokimligi xabariga ko‘ra, 7-avgust kuni Fanlar akademiyasi Temuriylar tarixi davlat muzeyi direktori, tarix fanlari doktori Xurshid Fayziyev va boshqa bir guruh mutaxassislar majmua qurilishi uchun taklif etilayotgan hududni ko‘zdan kechirgan, loyiha konsepsiyasi, me’moriy yechimlari va amalga oshirish mexanizmlarini muhokama qilgan.

Loyihaga ko‘ra, majmua markazida Amir Temur haykali o‘rnatiladi. Uning atrofida muzey, kutubxona, madrasa, mehmonxona, hunarmandchilik va zargarlik do‘konlari, milliy taomlar maskani, istirohat bog‘lari, favvoralar hamda tarixiy uslubdagi bosh kirish arkasi barpo etiladi.