Shahnoza Mirziyoyeva: Besh yoshli qizaloqning oilasi boshqa shaharga ko‘chib o‘tadi
Ijtimoiy himoya milliy agentligi direktori birinchi o‘rinbosarining ma’lum qilishicha, oilaga familiyani o‘zgartirish masalasida ham amaliy
Shahnoza Mirziyoyeva: Besh yoshli qizaloqning oilasi boshqa shaharga ko‘chib o‘tadi
Namanganda besh yoshli qizaloq bilan bog‘liq og‘ir fojia sodir bo‘lgach, O‘zbekiston Respublikasi Ijtimoiy himoya milliy agentligi vaziyatni o‘z nazoratiga olgan.
Uning aytishicha, hodisaning ilk kunlaridanoq agentlik mutaxassislari va psixologlari qizaloq hamda uning onasi bilan ishlamoqda. Oilaga ushbu og‘ir vaziyatni yengib o‘tishi uchun zarur ijtimoiy va psixologik yordam ko‘rsatilmoqda.
«Oila boshqa shaharga ko‘chib o‘tadi. Ular uy-joy va zarur reabilitatsiya xizmatlari bilan ta’minlanadi. Oilaga to‘liq ijtimoiy yordam ko‘rsatiladi. Xususan, qizaloqning onasiga o‘qishini davom ettirish va ishga joylashishida ko‘mak beriladi», — dedi Shahnoza Mirziyoyeva.
Uning ma’lum qilishicha, zarurat tug‘ilganda oilaga familiyani o‘zgartirish masalasida ham amaliy yordam beriladi. Ushbu choralar asosiy maqsadi qizaloq va uning yaqinlarini xavfsiz muhitga olib chiqish, ularga yangi hayot boshlashi uchun zarur sharoit yaratishdan iborat.
Mazkur masala Prezident Administratsiyasi tomonidan ham alohida nazoratga olingan. Voqeaning dastlabki kunlaridanoq tegishli davlat idoralari va mas’ul tuzilmalar jarayonga jalb etilgan.
«Mazkur jinoyat aslo jazosiz qolmaydi», — dedi Shahnoza Mirziyoyeva.
Hozirda eng muhim vazifa jabrlangan bolaning xavfsizligini ta’minlash, uning ruhiy holatini tiklash va oilasini har tomonlama qo‘llab-quvvatlashdan iborat. Shu bilan birga, jinoyat yuzasidan qonun doirasida tegishli choralar ko‘rilishi kutilmoqda.