Serxio Ramos faoliyatini APLda davom ettirishi mumkin — AS
Serxio Ramos faoliyatini APLda davom ettirishi mumkin — AS
Ispaniyalik himoyachi Serxio Ramos faoliyatini Angliya Premyer Ligasida (APL) davom ettirishi ehtimoli bor. 40 yoshli futbolchiga “Aston Villa” klubi jiddiy qiziqish bildirmoqda.
Tajribali himoyachi Meksikaning “Monterrey” klubidan ketganidan keyin erkin agent maqomida qolmoqda. U so‘nggi rasmiy uchrashuvini 2025-yil dekabr oyida MX Ligasi doirasida o‘tkazgan edi. Hozirda ispaniyalik himoyachi yakka tartibda mashg‘ulot olib borib, munosib takliflarni kutmoqda.
Ramos faoliyatining asosiy qismini Madridning “Real” klubida (2005–2021) o‘tkazgan. “Qirollik klubi” tarkibida 16 mavsum davomida jami 671 ta o‘yinda maydonga tushib, 101 ta gol va 40 ta golli uzatmaga mualliflik qilgan. Jamoa sardori sifatida u to‘rt marta Chempionlar Ligasida va besh marta Ispaniya chempionatida g‘olib chiqqan. “Real”dan keyin Ramos Fransiyaning “PSJ”, Ispaniyaning “Sevilya” va Meksikaning “Monterrey” jamoalarida ham to‘p surgan.
Unay Emeri boshqaruvidagi “Aston Villa” o‘tgan mavsum Yevropa Ligasida g‘olib chiqib, Chempionlar Ligasiga yo‘llanma olgandi. Ammo yangi mavsum jamoa uchun omadsiz boshlandi. Klub dastlabki to‘rtta turda atigi bir ochko to‘plab, turnir jadvalida 19-o‘rinda bormoqda.