Seriyali qotil Ted Bandi 52 yildan soʻng oʻsmir qizning qotili ekanligi aniqlandi
Yuta shtati hukumati dong taratgan qotil qatl etilganidan oʻnlab yillar oʻtib, eski ochilmagan jinoyatni fosh etish uchun ilgʻor DNK texnologiyasidan foydalandi.
Seriyali qotil Ted Bandi 52 yildan soʻng oʻsmir qizning qotili ekani aniqlandi
Yuta shtati hukumati ilgʻor DNK texnologiyasidan foydalanib, dong taratgan seriyali qotil Ted Bandini 52 yil avval ovchilar tomonidan jasadi topilgan 17 yoshli qizning oʻlimiga aloqadorligini isbotladi.
Mahalliy politsiya boshligʻining qizi Melissa Enn Smit 1974 yil 27 oktyabrda zoʻrlash va qiynoq belgilari bilan topilgan edi.
Aprel oyida Yuta rasmiylari yana bir oʻsmir — Lora Enn Eymni Bandining navbatdagi qurboni sifatida aniqlagan edi. Ushbu ishdagi dalillar keyinchalik Smitning ishini hal qilishga yordam berdi.
1989 yilda qatl etilishidan oldin Bandi Yuta shtatida yana ikki oʻsmir qizni oʻldirganini tan olgan edi. U AQSh boʻylab kamida 30 ta qotillikka aloqador deb topilgan.
Seshanba kuni oʻtkazilgan matbuot anjumanida Yuta okrugi serjanti Mayk Reynolds shtatda Bandi bilan bogʻliq boshqa ishlar hali ham koʻrib chiqilayotganini aytdi. "Har bir ishning yopilishi bilan Ted Bandi haqidagi xotirani oʻchirib tashlaylik", dedi u.
Solt-Leyk okrugi sherifi Rozi Rivera bu ish boshqa ochilmagan jinoyatlar qurbonlariga "umid borligini" koʻrsatishi kerakligini aytdi.
"Har kuni kriminalistika oʻzgarmoqda va bizda ushbu ishlarni qayta-qayta koʻrib chiqish imkoniyati mavjud", dedi u.
U shuningdek, detektivlarni ushbu ishdagi dalillarni shuncha vaqt davomida saqlab kelishgani uchun olqishlab, bu "hatto oʻn yilliklar oʻtsa ham dalillarni saqlash zarurligini koʻrsatishini" aytdi.
Aprel oyida Yuta shtati Sud-tibbiy ekspertiza byurosi direktori Salt Lake Tribune nashriga shtatda 444 ta ochilmagan oʻlim holati boʻyicha tergov hali ham davom etayotganini, jumladan 258 tasi qotillik ekanini aytgan edi.
Bandi Amerikadagi eng mashhur seriyali qotillardan biri boʻlib, u oʻz qotilliklarini AQShning Tinch okeani shimoli-gʻarbiy qismidagi qurbonlarga hujum qilishdan boshlagan.
U jamoat joylarida ayollarga yaqinlashib, jozibasi yoki soxta jarohati bilan ularning ishonchini qozonishi, soʻng ularni xilvat joylarga olib borib oʻldirishi bilan tanilgan edi.
U ilk bor 1975 yilda ayolni oʻgʻirlagani uchun hibsga olingan va 15 yilga ozodlikdan mahrum etilgan. Ammo 1977 yilda u qamoqxona kutubxonasi derazasidan sakrab qochib ketgan.
U sakkiz kundan soʻng qayta ushlangan va yana qochib ketgan, 1978 yilda uzil-kesil ushlanguniga qadar odam oʻldirishda davom etgan.